旅行返黎後過咗幾日，終於算係再次整理過啲戰利品... 不過遲啲都要執多次房，好好安置佢地！既然整理完成，響正式開始講今次旅行嘅行程之前，等我都同大家簡單分享一下我嘅戰利品啦！
歡迎大家黎到商品發佈會！先有30週年慶典 歡樂幸福年 主題商品！全部都係金光閃閃架！
東京迪士尼海洋 同時舉行 米奇和Duffy的春日巡航 活動，我呢個 Duffy 粉絲又點會忍到手丫...
Duffy 熱潮尚未完結！仲有一啲用咗 Cape Cod 漁村做主題嘅 迪士尼小熊 相關產品！
除咗 歡樂幸福年 同埋 Duffy，呢啲收穫都係響兩大主題樂園買嘅！有一部份係 反斗奇兵 主題商品！
響園外都有唔少 迪士尼 收獲：一系列 迪士尼商店 產品！之後行街又買咗個 Oswald 手機保護套！
大家響旅程日誌應該睇到，今次童話之旅期間去咗三間博物館，我響每一間都有少少收穫呢！
黎幅大合照先！上年只需一張枱就放得哂戰利品，但係今次實在太多啦，足足要三層先放得哂！諗返轉頭，我可以將咁多野運返黎香港，都可以話係一個奇跡！我都覺得自己痴線！
我另外都仲有部份戰利品同 幸福童話之旅 冇咩關係，所以冇擺埋一齊影大合照。
日本出名衫褲服飾靚，我都買咗啲服飾俾自己著！而臨走前響機場亦買咗一盒櫻抹茶朱古力！
日本嘅商店好多時都會俾多幾個膠袋，俾客人可以獨立裝起每一樣商品；今次買咗咁多野，所以膠袋都特別多！我數過，有超過100個 東京迪士尼渡假區 嘅膠袋！
膠袋嘅前後兩面分別印著 歡樂幸福年 以及 米奇和Duffy的春日巡航 呢兩個活動嘅圖案；但係因為 米奇和Duffy的春日巡航 活動快將完結，有部份膠袋嘅兩面都係 歡樂幸福年 圖案。
幾經辛苦，最後將所有膠袋摺好咗，方便收藏！摺完之後都仲有一大袋！
迪士尼商店 嘅膠袋，不同大小會有不同圖案，但有啲可惜嘅係幾年前已經係呢啲圖案，冇轉過...
不過有一個特別驚喜！店員俾咗一個 鴨咀獸泰瑞 嘅膠袋我！泰瑞 近期響日本都人氣爆燈！
而買夠3000日圓仲有一個 小熊維尼 紙袋送！維尼 又響到食緊蜜糖，好可愛！
迪士尼渡假區、迪士尼商店 之外，其他地點嘅膠袋唔算太特別，惟獨係 小王子博物館 幾有特式！
冇錯，東京迪士尼渡假區 真係好強！佢地有能力令我心甘情願俾錢買咁多野返黎！成日都話 香港迪士尼樂園 嘅商品設計麻麻地，其實都有好處，起碼唔會令我買到破產！哈哈！
沒有留言:
張貼留言