鐵路管制員? 萬聖節之王? 千變萬化的 Duffy 角色!

上次同大家分享過美國方面所推出嘅 Duffy迪士尼小熊 最新商品，係一件 毛毛造型服飾！樂園響早前經已開始發售，不過我對呢件衫興趣不大，所以請原諒我未有作出更詳細嘅分享。但係今日再上 迪士尼主題公園 嘅網誌睇咗一陣，發現佢地又再公佈咗幾樣新商品！

第一樣新商品正正就係 鐵路管制員服飾！上次已經響相片裡面隱約見到呢套衫！都幾靚喎！官方網誌表示，帽子嘅標誌會因應發售地點而改變，例如巴黎就係 巴黎迪士尼樂園鐵路 嘅標誌。唔知道，會唔會有一個版本係 香港迪士尼樂園鐵路 嘅標誌呢？我當然好希望會有啦！哈哈！

而另一樣新商品可能就要等多一排先至有機會響店內見到，因為係一套 萬聖節之王造型服飾！過去兩年嘅萬聖節，香港迪士尼樂園 都係賣緊 南瓜造型服飾，今年又會唔會有呢套新衫出現呢？

但係當我睇到呢套服飾嘅時候，我第一時間係諗起呢隻 米奇 嘅裝束！顏色同埋款式都有啲相似！呢隻毛公仔係黎自2008年嘅 迪士尼黑色世界，我覺得最神奇嘅係...  過咗5年我都仲未剪招牌！

除咗以上兩樣新商品之外，官方網誌都仲有提及幾樣快將推出 Duffy迪士尼小熊 嘅新商品。不過嗰啲都係一啲已經表明係其他 迪士尼主題公園 獨家發售嘅商品，香港應該就唔會有得賣啦...

Duffy 響不知不覺間已經扮演過每數角色，小飛俠、毛毛、瘋帽子、飛機師，魔法師...  而家又有兩個新角色登場，真厲害！點都好啦，我都好期待有一日可以響園內見到呢兩套新衫！