先前分別有兩篇「事物仔細尋」以及「想像‧帶動魔法」文章介紹過展示樂園海報嘅背景故事。而我尋日入園嗰陣，竟然有一個特別發現！就係失驚無神有全新嘅樂園海報出現咗！
香港迪士尼樂園 最新一齣上映嘅「電影」，當然就係剛剛響五月開幕嘅全新園區：迷離莊園！園方已經響不知不覺間，將呢個主題園區嘅海報刊登於樂園正門入口嘅火車橋底！
響 迷離莊園 可以見到好多紫色嘅元素，呢張海報都係以紫色為主，令迷離氣氛變得更濃厚！不過，我更加在意嘅係海報上面介紹莊園景點嘅畫作！好靚之餘，仲有部份係之前未見過嘅！
整張海報都製作得好有特式，係華麗嘅古典風格，貫徹返 迷離莊園 嘅背景故事！香港迪士尼樂園 好似都冇咩海報係擁有呢種風格，令到我特別鍾意呢幅 迷離莊園 海報！
回想上一次有新海報登場，已經係一年幾之前嘅 反斗奇兵大本營，灰熊山谷 一直都冇出現... 園方今次終於都同時新增 灰熊山谷 海報！可惜嘅係，呢幅圖片響其他印刷品出現過，驚喜冇咁大...
好啦！反斗奇兵大本營、灰熊山谷、迷離莊園 三個擴建園區嘅海報終於可以一家團聚啦！樂園裡面好多看似平凡嘅事物，其實暗藏意義；入去樂園玩都可以係一場解謎遊戲，哈哈！
沒有留言:
張貼留言