上星期五除咗去咗戲院上堂之外，我仲特別去咗 怪獸大學 位於銅鑼灣嘅校舍，探索一下！剛剛睇完齣戲就即刻去到實景現場，好似進入咗電影裡面嘅世界，呢種感覺好得意！
開始參觀校舍啦！一黎到門口，可以見到大大個 怪獸大學 Monsters University 嘅招牌！
到處都有 怪獸大學 嘅校徽，令所有人都知道，呢到就係怪獸世界最頂級嘅學府！
各位新生，你擁有屬於自己嘅學生證未呢？未有嘅話都唔緊要，即場整返張就可以架啦！
校舍嘅庭園有好多有趣嘅佈置，其中一樣就係雕塑水池！唔知呢位係唔係 怪獸大學 嘅創辦人呢？
另外，仲有一個學生資訊亭，有好多關於校園活動嘅資料！咦，仲有學生會選舉廣告喎！
好啦，等我睇下有咩會社適合我先！嗯... 至嚇會 嘅成員好似好惡咁嘅... 似乎唔係咁啱我...
睇黎都係 啱Key會 溫馨嘅大家庭啱我多啲！會長 唐叔 響到同各位新生打招呼！
其他會員 淋支支、阿拱、向左和向右 都幫忙招募新成員！好！我決定加入 啱Key會！
睇完會社，又等我睇下有咩學會可以加入先！辯論學會、美術學會 都招募緊新會員喎！
但係講到 怪獸大學 校園生活之中最緊張刺激嘅活動，就必然係一年一度嘅 驚嚇全運會！
點算！啱Key會 唔夠人參加全運會啊！好彩，咁啱有兩位新同學登記入學！即刻招攬佢地入會先！
完成報名啦！但係掛住認識新同學，盪失路添... 呢個校園咁大，邊識路啊... 研究下校園地圖...
睇完地圖，終於搵到 怪獸大學 最著名嘅學院，驚嚇學院 嘅位置！又係時候準備上堂啦！
有一位同學衝緊入去喎！意味著課堂快將開始啦！雖然已經出盡力，但佢嘅速度依然係比較慢喎...
入到去學院裡面，抬高頭可以望到一道道門掛咗響到；對於怪獸世界黎講，門係好重要㗎！
課堂開始啦！啱啱好，冇遲到！K教授 向學生問問題，好多隻 大眼仔 舉手搶住答！
落堂後繼續參觀！課室旁邊係一間實驗室，兩位同學分別響到了解緊門嘅系統以及電力系統！
下一個參觀地點：宿舍！好大個「歡迎新生」嘅橫額！宿舍裡面，各位同學們都玩得好瘋狂喎！
其中一間房正正就係兩位 啱Key會 新成員嘅房間！毛毛、大眼仔 響到練習緊驚嚇絕技！
房內放咗好多 大眼仔 嘅個人物品，有參考書，亦有佢最愛嘅怪獸毛公仔：小米奇 Little Mikey！
而牆上就掛滿關於嚇人嘅海報，相信 大眼仔 一定係用黎鼓勵自己，提升自己嘅士氣！
為方便咁多位同學們，宿舍裡面設有一間學生商店，專門發售玩具、衣物、樂園門票。
其實宿舍嘅範圍都幾大，除咗以上場景，仲有部份位置展出電影概念圖，同埋其他同學嘅學生證！
呢張係 向左 嘅學生證，但係因為 向右 同佢連住咗，所以要一齊影！好搞笑啊！
特別版教職員證：係屬於 斯克薄院長 嘅！學生證用咗藍色做主色，而教職員就係用紅色做主色！
參觀校舍黎到尾聲啦！最後，為大家送上一張 怪獸大學 電影海報！「怪獸」山「怪獸」海呢！
近期唔知點解突然冇咩動力寫Blog，寫文章寫得好慢，一日一篇嘅承諾慢慢又再落空咗... 我都好想快啲寫到去有關 東京迪士尼渡假區 嘅文章，所以要認真加把勁！希望可以重拾心情啦！
沒有留言:
張貼留言