申請入學! 正式成為怪獸大學生!

轉眼間，樂園裡面嘅 招收怪獸大學生 活動經已開始咗超過兩個星期，你地申請入學未啊？剛剛過去嘅星期日，我終於完成申請入學，正式成為 怪獸大學 嘅學生啦！仲拎咗兩張學生證添！

又再黎到 香港迪士尼樂園 怪獸大學行政大樓，每次入園都會見到好多人排隊等候申請入學！正正因為申請入學要等咁耐，所以我先會決定一次過整兩張，令自己整個暑假都唔需要再入去...

等咗大約一個鐘，終於都入到去大樓！成為 怪獸大學 嘅學生之前，梗係要了解多啲校園資料！首先要認識一下 驚嚇學院 靈魂人物：斯克薄院長！大樓內裡都放有佢嘅塑像！

不過我都係對多姿多采嘅校園生活比較有興趣，等我留意下告示板，睇下呢間大學有咩得意野啦！

緊張嘅時刻要來臨啦！我要影學生相啦！即將入讀 怪獸大學 驚嚇學院，我要展現最驚嚇嘅一面！

影完相，可以即時去到 小鎮沖印店 領取學生證，每張需要支付行政費$40，價錢都算合理。以下就係我所揀選嘅學生證款式！上面亦都印有學生名稱 ( 可以自由填寫 ) 以及學生編號！

成為 怪獸大學 學生後，我第一時間就加入咗自己最想加入嘅學會：美術學會！我而家已經學識咗點樣畫 大眼仔！但係佢都唔易畫架！要畫埋帽子、手手腳腳，我跟唔切啊！

聽聞 毛毛 同埋 大眼仔 好似有危機，可能會畢唔到業...  估唔到我一入學，就已經畢埋業！領取學生證嘅同時，樂園會即時將你嘅畢業證書上傳到官方網頁，只要輸入學生編號就可以獲得！

今個暑假，準備好入讀 怪獸大學 未呢？申請入學之餘，仲要記得7月11日就係 怪獸大學 開學日！雖然我已經畢咗業，但係我都會去戲院上堂架！到時，一齊投入搞笑趣怪嘅校園生活啦！