愛上 Oswald幸運兔子... 三位新的家族成員!

尋日《幸福‧童話》故事就提及新朋友 Oswald幸運兔子 加入咗我地嘅幸福童話之旅！但其實除咗嗰隻 Oswald 毛公仔之外，響其後嘅旅程我都買咗另一啲 Oswald 相關商品！既然講開呢隻兔仔，就等我分享埋呢幾樣戰利品啦！

故事中嘅 Oswald，大小係同 大Duffy 差唔多；不過 迪士尼商店 同時都有發售另一款細啲嘅！

大Oswald 同埋  小Oswald 同樣都著住一條藍色短褲，亦有毛茸茸嘅尾巴，好可愛！

除咗傳統版之外，佢地仲推出咗特別版 軟綿綿Oswald！又係有大有細，而我就買咗一隻細嘅。

軟綿綿Oswald 嘅尾巴更加毛茸茸！不論 Duffy 抑或 Oswald，我都好鍾意搞佢地條尾，哈哈！

響 迪士尼商店 買咗三隻 Oswald，之後行下百貨公司，又俾我搵到一個 Oswald 手機保護殼！

包裝上印有 Oswald 嘅名字、樣貌；Oswald 呢個樣係同先前嘅樂園時間表封面一樣架！

呢個包裝真係整得好靚！背景係 Oswald 動畫作品嘅畫面，可以睇返佢做主角嗰陣嘅情境！

我本身以為呢個保護殻係硬身嘅，但原來係軟身；都好嘅，軟身應該冇咁易爛，唔會斷開。

呢個保護殼係iPhone 5專用嘅，好彩我啱啱換咗新機咋！如果唔係就冇得用呢個咁得意嘅保護殼！

我終於可以組織屬於自己嘅 Oswald 家族！仲要話咁快就已經有三位成員！好開心啊！Oswald 已經成為我嘅新寵兒啦！不過 Duffy 依然響我心目中排第一！佢冇咁易被取代嘅，嘿嘿！