把520位 迪士尼朋友 合而為一!

近期都將 幸福童話之旅 聚焦咗響故事嗰方面，忽略咗商品呢邊...  所以今日就出返篇商品啦！我原意係想商品配合行程嘅相關主題黎出，但係都有部份商品係同行程無關，以下就係其中之一！今次分享嘅係一盒拼圖遊戲！大家請睇睇以下呢幅完成作品，你認唔認得出佢係邊個呢？

呢盒拼圖我係響 東京迪士尼海洋 買嘅，東京迪士尼樂園 都有，其實好多商品係兩邊同時發售嘅。點解我會買佢返黎呢？我會形容佢係非一般嘅拼圖遊戲！因為每塊拼圖係代表著一位 迪士尼朋友！

一共有520塊拼圖，由最初期嘅 米奇家族，慢慢去到現代嘅 迪士尼朋友！Pixar 嘅作品都有份架！呢盒拼圖最後一班 迪士尼朋友 係黎自2010年嘅《魔髮奇緣》，再新啲嘅 迪士尼朋友 就暫時未有...

有一本說明書介紹遊玩方法，亦包含五幅組合圖，分別係 米奇、米妮、唐老鴨、胡迪、奇妙仙子！書內同時都有列出全部520位角色嘅簡介，可惜係日文...  不過都可以知道佢地係黎自邊一齣動畫！

話者你會諗，說明書裡面都冇 Duffy，點解整到嘅？咁係因為，佢地可以幫你拼出自己鍾意嘅圖片！只要預備一張圖片，上載到指定網站，幾分鐘之後，佢地就會提供一個合適嘅拼圖組合！好正！

有咗拼圖組合，就可以開始砌啦！盒內附有有一塊底卡，可以跟住排列，將圖畫整齊地砌出黎！砌完後可以用固定劑令整幅拼圖唔會散開，但我冇用到，因為我仲諗住砌多幾個不同圖案，哈哈！

我砌 Duffy 嗰陣，第一輪會跳過所有唔識嘅 迪士尼朋友，最後都有大約一半漏空咗...  我好唔掂...  砌呢幅拼圖的確好考 迪士尼朋友 知識！而我玩完之後，又認識咗更多 迪士尼朋友！好好玩！最驚喜係可以自訂圖片，但係有啲圖片可能展現得唔太明顯，等我遲啲再試下砌另一啲圖畫先！