由上個月開始，樂園陸續推出全新嘅 八週年系列商品，而近期就出咗一樣我覺得幾特別嘅商品！我講緊嘅，就係金屬紀念名牌！咦，後面好似仲有另一樣野喎，究竟係咩呢？一陣間開估！
呢個八週年金屬名牌，同平時嘅塑膠名牌一樣，都可以免費刻上名字，我當然要為自己整返個啦！整個名牌以金屬外框包圍，名牌上面印有八週年標誌，而旁邊仲有穿上八週年服飾嘅 米奇！
底部同樣係金屬質地，印有 香港迪士尼樂園 標誌，亦有另一款式嘅八週年標誌。
好啦！要開估啦！呢篇文章嘅開端就出現咗一樣神秘嘅物件，其實都係一個金屬名牌黎嘅！不過呢個名牌就唔係黎自 香港迪士尼樂園，而係黎自 東京迪士尼渡假區！
東京迪士尼海洋 為配合整個渡假區所舉行嘅 三十週年慶典，響7月1日開始發售呢款金屬名牌。所以，名牌嘅背後就刻有 東京迪士尼渡假區 標誌，以及佢地嘅三十週年標誌。
購買呢款金屬名牌都可以選擇附加一條金屬帶，但係佢地嗰邊就需要加錢嘅。
除咗金屬帶，仲有好多額外裝飾可供選購，可惜每一粒都唔便宜，最終令我卻步...
三十週年嘅其中一個商品主題，就係回顧咁多年黎響渡假區內出現過嘅 米奇 造型；我嗰個名牌係三十週年黃金服飾，事實上，仲有好多款式！每一款更加係展示返當時嘅週年標誌！
另一方面，佢地亦有配合其他主題節慶活動推出更多款式，以下分別係萬聖節、夏日活動嘅名牌。值得一提嘅係，金屬名牌所採用嘅刻名字型係同演藝人員名牌相同嘅，感覺上更加像真！
不如比較一下香港同埋東京嘅出品啦！放埋一齊就發現，人地嘅名牌比起我地細啲啲，更加精緻！
至於名牌上面嘅 米奇，東京嘅線條稍為纖幼一點，有仔細嘅花紋，而顏色亦都較為光亮。但係，當我回想起人地嗰個名牌大約係我地嘅三倍價錢，我都唔介意降低自己嘅要求，哈哈！
咁呢個名牌可以點用呢？最直接嘅用法當然就係掛響袋上，成為一個自己專屬嘅裝飾啦！
不過我都諗到另一個用法，就係成為 Duffy小熊 嘅新飾物！但其實條帶唔算長，戴起上黎有啲緊...
我係6月嘅時候到訪 東京迪士尼渡假區，呢個新名牌7月先至推出，響到要感謝一位朋友幫我購買！同時，我亦有請佢幫我買多件新出嘅 Duffy小熊 三十週年T恤，遲啲會連同另外兩套服飾再作介紹！
講返金屬名牌先，我第一次響園內商店見到嗰陣，心裡都嚇咗一跳，因為同東京真係好似樣...我今次就唔研究係唔係「參考」人地啦... 但能夠嘗試學習人地嘅優點，都係一樣好事黎嘅...
撇開整得同人地非常相似，我覺得今次呢個名牌算係唔錯嘅，希望樂園嘅商品設計可以繼續進步！不斷有新嘅八週年商品登場，我相信自己遲少少仲會買多幾款，買咗之後再同大家分享一下啦！:)
沒有留言:
張貼留言