《Disney Infinity》迪士尼無限世界 強勢登場！我會話佢係史上製作得最認真嘅 迪士尼 電玩遊戲！咁係因為呢個遊戲有好多賣點，包含非常豐富嘅 迪士尼 元素之餘，更加結合現實同埋虛擬世界！大約推出咗一個星期，經已大受好評！我作為一位 迪士尼 Fans，當然都要買返屋企試玩一下！
要啟動《Disney Infinity》嘅遊戲世界，就必須首先購買 Starter Pack 基本套裝。我買嘅係 Wii 版本，不過有一樣野要注意，Wii 及 Wii-U 版本一定要用美版主機先玩得到嘅。
即刻拆開包裝睇睇先！呢個 基本套裝 有齊哂新手所需要嘅配件，數量都幾多喎！不同配件都有各自嘅功能，令到整個遊戲玩法變化多端；呢個就係我會話佢整作認真嘅原因！
整個套裝裡面最重要嘅，當然就係《Disney Infinity》遊戲光碟，要靠佢啟動遊戲嘛！包裝盒內除咗光碟，仲有說明書；不過我覺得冇咩用，畢竟遊戲嘅自由度咁高，要親自領略先得！
遊戲光碟固然重要，但係對於《Disney Infinity》黎講，仲有另一樣好重要嘅配件！就係 Infinity Base 無限世界底座！佢會幫我地將現實世界、虛擬世界連接起黎！
《Disney Infinity》其中一個賣點就係佢地嘅實體 迪士尼朋友 模型，基本套裝 就附有三個。三位 迪士尼朋友 分別係 毛毛、超能先生、傑克船長，佢地會化身成為玩家所使用嘅遊戲角色。
另一樣實體配件就係 Play Set Piece 遊戲場景啟動器，用作響遊戲內通往不同嘅遊戲場景。通常每一個啟動器只能通往一個遊戲世界，但係 基本套裝 附送嘅呢個就可以通往三個遊戲場景。咁究竟係邊三個遊戲場景呢？同埋係點樣啟動遊戲場景嘅呢？等陣間會再有進一步嘅示範。
仲有一樣實體配件！就係 Power Disc 能量板！基本套裝 會為玩家提供第一塊 能量板！咁究竟 能量板 又有咩用呢？請容許我繼續賣關子，因為我想等到介紹遊戲模式嗰陣先至詳細講...
套裝嘅最後一樣配件，係一張角色儲值卡；上面會有序號，玩家可以到官方網頁進行儲值。儲值後，就可以響未來推出嘅《Disney Infinity》電腦、iPad 版本獲得儲值卡上所顯示嘅角色。
好啦！開始講解遊戲模式啦！遊戲模式分為兩種，分別係 Play Set 遊戲場景、Toy Box 玩具箱！我會首先介紹 遊戲場景 模式！正式開始玩之前，先要揀出自己想使用嘅角色同埋場景啟動器！咁暫時只得一個啟動器，唔需要揀啦；至於角色我就揀咗 毛毛！跟住就將兩樣實物放上底座...
現實世界、虛擬世界經已被連接起黎！電視畫面隨即出現咗《怪獸大學》場景以及 毛毛 角色！可以響場景入面大玩特玩啦！每個場景都會有好多任務，另外仲可以見到嗰個場景嘅 迪士尼朋友！我而家只係試玩咗《怪獸大學》，我響遊戲入面見到 向左和向右！另外有 淋支支、變色龍 等等...
剛才講到，基本套裝 附送嘅 場景啟動器 係可以通往三個遊戲場景，第二個就係《超人特攻隊》！又有一樣野要留意，響遊戲場景裡面，只可以使用屬於嗰個場景嘅 迪士尼朋友 進行遊戲。舉例：玩家唔可以響《超人特攻隊》場景使用黎自《怪獸大學》嘅 毛毛，一定要使用 超能先生。
換言之，基本套裝 附送嘅第三個場景，就必然係 傑克船長 所屬嘅《加勒比海盜》！雖然我只係試玩咗一個場景，但已經覺得遊戲場景設計得非常出色，好靚之餘亦有大量互動元素！再者，佢地仲整咗一啲電影未出現過嘅地點！例如《怪獸大學》場景可以參觀 驚嚇科技學院 校園！
咦？每個場景只可以用返相對應嘅 迪士尼朋友？咁咪即係每個場景只得一個角色可以使用？唔緊要！講到明《Disney Infinity》係沒有限制嘛！點會限定淨係可以使用一個角色呢？
假如唔想永遠都只係用 毛毛、超能先生、傑克船長，就可以額外購買另一啲 迪士尼朋友 模型。買咗返屋企之後，將模型放上底座，就可以使用架啦！不過梗係要附合返所屬嘅場景啦！
每個額外角色都可以獨立購買 迪士尼朋友 模型，但係佢地都有推出優惠裝，三個組成一盒。現時分別有 拍檔角色套裝、壞蛋角色套裝，計返會平啲，但係就未必三個都係自己所鍾意嘅...
咁如果唔想玩黎玩去都只得三個場景，又得唔得呢？都冇問題，同樣可以購買額外場景！《Disney Infinity》現階段推出咗五個場景，其餘兩個係《反斗車王》以及《獨行俠》。購買 附加場景套裝，會包含一個 遊戲場景啟動器，同埋兩個該場景嘅所屬 迪士尼朋友。
都係買咗返去之後，將啟動器、角色模型放上底座，就可以開始探索新嘅遊戲場景！我本身想一次過買埋《反斗車王》附加場景套裝，好似好靚咁... 不過我最後好冷靜咁打消念頭...
跟住我而家見到《獨行俠》場景裡面嘅火車，又覺得好靚！再次有啲衝動想去買 附加場景套裝！可以持續買額外場景、角色可以話係有好有壞，玩極都唔會厭，但係我地一班Fans嘅錢包就...
輪到第二個遊戲模式：玩具箱！呢個係一個真真正正完全冇任何限制嘅遊戲模式！再冇角色場景限制，裡面嘅建築物亦係由玩家自己設計！想起一個 迪士尼樂園 都並非冇可能！透過響《Disney Infinity》進行遊戲，玩家可以免費獲得好多建築物，我之前就得到 幽靈公館！
另一方面，《Disney Infinity》仲有好多小玩具，俾玩家可以響 玩具箱 裡面玩餐飽！有啲玩具係車輛，可以揸車周圍去；有啲玩具係武器，可以用黎整蠱人；總之，就係咩都有！運用想像力，製作屬於自己嘅 玩具箱，根據自己喜愛嘅玩法進行遊戲，遊戲世界再無界限！
但係，有啲比較特別嘅遊戲物品，就唔可以免費獲得，需要使用 能量板 先至可以得到。能量板 分別三種：角色能力升級、特別玩具、玩具箱地型，全部都係同 迪士尼朋友 有關嘅。好似會有一款 能量板，可以響 玩具箱 啟動 小飛象，俾玩家坐上去翱翔天際！我都好想試下啊！
購買 能量板套裝，可以獲得額外嘅 能量板；每包會隨機附有兩塊，想要特定一塊就要視乎運氣了... 但係，一包 能量板套裝 都唔算平，同埋響網上見到有玩家分享，話自己買咗兩包已經有重覆... 不過我預計慢慢會有《Disney Infinity》玩家群組相繼出現，到時或者可以私底下交換 能量板。
當見到佢地一下子推出咁多個別發售嘅配件，就令我覺得，佢地推出呢個遊戲好大可能係想賺錢。但我的確不得不佩服，佢地花咗好多心機為 迪士尼 Fans們帶來一個非常震撼嘅電子遊戲！我亦相信呢個遊戲世界將會不斷擴大，睇返官方專頁過往嘅圖片，就可以見識到呢個遊戲嘅潛力！
《Disney Infinity》現已登陸 Wii 及 Wii-U ( 只適用於美版主機 )、PS3、Xbox360、3DS！睇完呢個遊戲咁出色嘅場景設計以及無限制嘅遊戲玩法，唔知有冇吸引到你買返屋企玩下呢？而家就講住咁多先，我遲啲玩完之後，會再睇下有冇更多有趣嘅新發現可以同大家分享！
沒有留言:
張貼留言