香港迪士尼樂園 鐵甲奇俠總部 將於2016年開幕!

半年前，財政司司長曾俊華先生於發表財政預算案時表示，香港迪士尼樂園 將會興建一個以 Marvel 漫畫英雄為題嘅全新園區。黎到今日，不論新聞抑或樂園官方專頁，都一同公佈：全新遊樂設施 鐵甲奇俠總部 The Iron Man Experience，將於2016年年底開幕！

根據新聞報導，呢個新嘅遊樂設施將會興建於現時嘅 明日世界 裡面，同之前財政司司長所表示嘅全新園區有所出入。但其實，咁樣我反而更開心，因為我一直都覺得 Marvel 角色未必同 迪士尼樂園 嘅主題非常恰配；亦認為，相比起其他 迪士尼朋友，迪士尼樂園 未至於需要為呢班新加入 迪士尼 嘅角色興建一整個主題園區。而家，樂園決定係響 明日世界 興建一個主題遊樂設施，我相信會更加容易融合於園區裡面，唔會破壞樂園嘅整體故事性！

講返遊樂設施本身先！呢個遊樂設施，將會帶領賓客與 Iron Man 進行一次飛行任務，賓客將會登上飛行船對抗敵人，期間更加會見到我地嘅城市：香港 嘅場景！鐵甲奇俠總部 作為 香港迪士尼樂園 獨有嘅遊樂設施，並且進一步加入本地元素，我覺得係值得一讚！遊玩期間可以見到香港，感覺應該會幾特別！





講到飛行船，相信今次所使用嘅系統應該同其他 迪士尼主題樂園 嘅遊樂設施 Star Tours 星際旅行 係一樣嘅，呢架船能夠模擬出搖晃、震動、下墜等等嘅體驗；我剛剛響 東京迪士尼樂園 玩過，都幾刺激架！所以，假如你係比較鍾意刺激少少嘅遊樂設施的話，就一定要期待今次呢個 鐵甲奇俠總部 啦！





咁究竟呢個遊樂設施嘅確實位置響邊到呢？雖然而家就未有確實消息，但其實 明日世界 唔係剩返好多空位，有傳今次嘅 鐵甲奇俠總部 會響園區最入嘅一個角落興建，鄰近 巴斯光年星際歷險 以及 馳車天地 嘅入口。報導指，除咗遊樂設施，園方亦將會同時興建一間商店以及一個與 Iron Man 見面嘅地點，總之，就係一個 Iron Man 嘅主場啦！嘩，能夠響咁有限嘅空間起到咁多野，真係要佩服一眾 幻想工程師！





最後，值得一提嘅係：今次嘅興建費用將會完全由樂園營餘負責，唔需要政府出資，亦即係唔需要經過立法會批核。好慶幸樂園終於可以自資進行新工程，因為假如需要政府出資，過程會比較繁複，亦存在變數，甚至會被立法會否決...  另一方面，見到樂園有能力自己賺錢，然後再投放於提升園內嘅遊樂體驗，作為樂園Fans，可以用「感到安慰」黎形容！

雖然首輪擴建嘅三個主題園區經已全部開幕，但係 香港迪士尼樂園 響未來幾年仍然有好多新焦點！先係2014年嘅夜間巡遊，然後係2015年嘅十週年慶典，最後就係2016年嘅 鐵甲奇俠總部！期待見到樂園繼續進步，就等我地一齊拭目以待啦！