Tho's Dreams: 繼續徽章狂熱! 款式多樣的迪士尼徽章!

香港迪士尼樂園近期都推出咗唔少新嘅徽章，見到一啲靚嘅徽章，我又會忍唔住買... 另一方面，園方所推出嘅限量版徽章，款式亦都愈黎愈多，有部份限量版徽章更加會響推出後短短幾日就會賣哂！所以，有時為咗一個靚嘅徽章就需要專登需要衝入樂園買... 我開始有啲後悔開始咗儲徽章呢個習慣... 不過，見到自己嘅收藏愈黎愈多，都有少少滿足感嘅！

講到徽章狂熱，就一定唔可以唔講八週年，因為園方史無前例地推出咗多款八週年主題徽章！當我以為已經出哂，但係過多冇幾耐又會無啦啦有新徽章登場！最後，又搞到我買咗好多徽章返黎！

八週年嘅徽章全部都金光閃閃，設計都唔差！當中比較有驚喜嘅，就係一套由八位迪士尼朋友組成嘅徽章系列；講到八位迪士尼朋友，你係唔係好自然會諗起米奇家族呢？但今次唔係，呢八位迪士尼朋友全部都係一啲響園內較為少見嘅迪士尼朋友，所以先會話非常驚喜！

八款徽章係分四個階段推出，每階段推出兩個。首階段推出嘅係《小鹿班比》Thumper、《阿打丁》Genie，需要兩個同時購買，並且會附送擺設卡紙一張。其實六個徽章，分別係《小魚仙》Sebastian、《小鹿班比》Bambi、《獅子王》Simba、《愛麗絲夢遊仙境》Cheshire Cat、《木偶奇遇記》Figaro 以及《海底奇兵》Nemo。

呢套徽章，每款都係限量300枚，所以都幾搶手，每星期都要記得入園買！徽章背後印有「Limited Edition of 300」限量300枚嘅字樣，亦有八週年標誌；另外，仲有「X of 8」字樣，顯示呢款徽章係整個系列之中嘅第幾款，例如 Nemo 嗰個款就係顯示「8 of 8」。

好啦，成功買齊一套，將所有徽章放上擺設卡紙啦！都幾靚喎！但其實我唔會用黎做擺設，只會擺埋佢作收藏，因為都我間房已經冇位放一個咁大舊嘅擺設，哈哈！

繼續係八週年徽章，以下係兩款限量版巨型徽章：左邊係八週年會員珍寶徽章，係奇妙處處通會員獨家購買嘅，以睡公主城堡做背景，再配上一個八週年標誌。右邊嘅係樂園八週年珍寶徽章，於八週年當日正式推出，上面有七位米奇家族成員，但係布魯托就唔知去咗邊... 八週年，唔係應該八位成員濟濟一堂架咩？

兩款珍寶徽章嘅背面都有註明「September 12, 2013」八週年嘅日期，以及推出數量；八週年會員珍寶徽章限量500枚，樂園八週年珍寶徽章限量300枚。另外，同以往嘅會員專享獨家徽章一樣，今次嘅八週年會員珍寶徽章亦都印有奇妙處處通標誌。

限量版徽章需要趕住買，但其實就算唔係限量版都有機會好快賣哂... 除咗以上嘅八週年限量版徽章之外，園方都有推出八週年吊飾徽章系列，當中米奇、米妮嘅一款就曾經出現過缺貨情況！好彩最後都返返貨，我仲買埋奇奇、帝帝嗰款徽章添！呢個系列嘅徽章，中間有個「8」字型嘅空框，掛有一個展現米奇身影嘅吊飾，幾特別喎！

我發現自己真係買咗好多以八週年做主題嘅徽章！最後一樣，就係一罐八週年罐裝徽章！呢罐徽章全套有十五款，每買一罐可以隨機獲得其中嘅五款！我本身就想要米奇、唐老鴨、奇奇、帝帝同埋小飛象；打開個罐，五個徽章之中有兩個係米奇同埋唐老鴨！其餘三款，就慢慢留意下有冇得換返黎啦！

終於講完八週年，但係都仲有好多不同主題嘅徽章同大家分享！暑假期間，園方就推出咗一個迪士尼朋友吊墜徽章系列，凡購買任何款式嘅徽章兩個，就可以用優惠價換購迪士尼朋友吊墜徽章一個。整個系列總共有八款，每款限量500杖，而我就淨係買咗一款我鍾意嘅迪士尼朋友：小熊維尼！可以將小熊維尼收埋響蜜糖罐入面，好趣緻啊！

之後就係一啲同節日有關嘅徽章啦！以下係一款米奇 2013中秋節徽章，限量300杖：米奇一隻手拎住燈籠，另一隻手拎住月餅，開心地渡過中秋節！徽章嘅右上角有一個圓圓嘅月亮，顯示城堡嘅影子，並印有「2013」嘅字樣；除此之外，徽章嘅下方亦掛有一個中式掛飾，配合返中秋節嘅主題！

呢排，迪士尼黑色世界2013 舉行得如火如荼，而早前我都買咗好幾款萬聖節主題徽章！萬聖節徽章同其他商品一樣，都係分為米奇家族以及怪誕城之夜兩個系列。先講米奇家族系列啦！我總共買咗三款，全部都係限量500杖，其中一款係穿著萬聖節服飾嘅米奇、唐老鴨，之後另一款就有化身成天使魔鬼嘅奇奇、帝帝，仲有一款係我最愛嘅 Duffy迪士尼小熊！