Tho's Dreams: 萬聖節主題故事 -《黑色異幻》預告

上年，Tho's Dreams 連載過一個萬聖節長篇故事《黑色兩路》，用咗殭屍黨、狼人族嘅戰爭做背景，講述兩大魔黨嘅由來、仇恨嘅原因、以及當中一段淒美嘅愛情故事... 黎到今年，我突然又心血來潮，決定再次寫一篇夾雜詭秘、驚險、浪漫於一身嘅故事！

今次呢個故事，將會以今年迪士尼黑色世界2013 響樂園裡面新登場嘅黑色嘉年華「異」演作為背景，命名為《黑色異幻》！我自己真係好鍾意呢個表演，亦覺得六位奇人異士都好有魅力，所以最後就促使我希望寫一個以佢地做藍本嘅故事！

一個完整嘅故事，又點可以缺少男女主角呢？當我決定咗要寫《黑色異幻》呢個故事嘅時候，我心中已經有咗主角人選，就係冰女王、蝙蝠紳士！因為佢地兩個係所有奇人異士之中我最鍾意嘅人物！響上個星期，其實 Tho's Dreams 專頁經已率先作出《黑色異幻》嘅預告，刊登咗兩位主角嘅一段對白；而家，就等我再次放響呢篇文章，俾大家重溫一下！

「與生俱來，我擁有一顆冷酷的心；一直以來，沒有人能夠理解我的內心，直至那一天，我遇上了他... 幸運把他帶來我的身邊，他是惟一一個人能夠溶化我的冰冷；然而，幸運並未有讓我們在一起... 從來，我只懂將感情收藏，心裡明明深愛著他，卻說不出口...」

「由一出生開始，我就註定沒有愛；我只懂奪取生命，我根本沒資格去愛，直至那一天，我遇上了她... 命運把我和她帶到這個地方，她是惟一一個人能夠讓我重拾愛；然而，命運並未有讓我們在一起... 一直以來，我身體裡所流動的都是別人的血，我值得讓人愛我嗎...」

揀完主角，就要諗故事情節啦！當初構思《黑色異幻》嗰陣，除咗以黑色嘉年華「異」演做藍本，我都想當中嘅情節係寫成《黑色兩路》嘅後續故事！同時間，我亦希望可以延續上年嘅特點，將樂園本身嘅元素包含響故事裡面！

睇過上年嗰篇故事嘅讀者，唔知仲記唔記得，故事情節入面，都有好多野係同園內事物有關；例如，主角被設定響美國小鎮大街長大、詭墳學院為小鎮嘅孩子提供教育... 咁究竟今次又會包括啲咩呢？我當然要賣賣關子，不過以下就有三條問題，可以俾大家估住先！

今次嘅《黑色異幻》仲有一樣野係承接上年嘅！《黑色兩路》連載嘅時候，有朋友睇完之後好有心機咁根據故事情節畫咗啲畫俾我放上黎 Tho's Dreams；今年，我就主動邀請呢位朋友同我一齊合作；我負責寫故事，而佢就幫忙畫插畫！早前佢已經畫咗一幅蝙蝠紳士嘅作品，又等我放上黎俾大家睇下啦！靚唔靚呢？之後嘅每個故事章節都會有呢啲畫作架！