迪士尼雪亮聖誕2013 已經開始咗兩日，今日就首先分享一下園內佈置啦！每逢黎到聖誕，樂園都會掛滿好多好靚嘅聖誕裝飾，變得充滿聖誕氣氛，咁今年嘅裝飾又係點嘅呢？即刻同大家睇下！
一入到樂園，穿過正門火車軌底下嘅隧道，就會去到 美國小鎮大街！一如以往，呢個園區係全個樂園聖誕氣氛最濃厚嘅地方，呢到將會變成 聖誕小鎮，俾大家盡情感受聖誕節嘅歡欣！首先黎到嘅係 小鎮廣場，亭上掛有 米奇、米妮 頭型掛飾，但係點解好似有啲似曾相識...？
再望望旁邊，怪獸大學行政大樓... 丫，唔係，應該係 動畫藝術廊 先至啱，因為一眾怪獸學生經已經順利畢業離開咗啦！動畫藝術廊 重新開放，而外面嘅牆上亦都掛滿咗聖誕掛飾！
整個 聖誕小鎮 最矚目嘅佈置，必然係豎立響 小鎮廣場 前方嘅巨型聖誕樹！響整條大街都可以見到佢！今年棵聖誕樹同上年係一樣嘅，底下嘅裝飾亦都差唔多，所以我就唔多講啦... 不過我都好期待佢響亮燈之後閃閃生輝嘅景象！
以上睇咗 小鎮廣場、動畫藝術廊、巨型聖誕樹，其實全部都同上年差唔多；事實上，整個 聖誕小鎮 嘅佈置確實係同上年大同小異，甚至更加係比起上年少啲啲... 但係冇所謂啦，我都明白聖誕裝飾黎黎去去都係咁嘅樣，最重要係有聖誕氣氛啫！
而為咗迎接聖誕節，美國小鎮大街 嘅的士司機以及警察們都響各自嘅車上加入聖誕佈置！咁樣，的士乘客以及囚犯們都可以開開心心過聖誕啦，哈哈！
雖然裝飾冇咩新意，但係都有特別驚喜！響 迪士尼黑色世界2013 過後，大街嘅居民就開始為 廣場時尚店 去到 大街餐廳 嘅一列建築物進行粉飾，架起咗圍板；最估唔到嘅係，居民竟然照樣響圍板上掛咗聖誕掛飾！我一開頭就覺得好似怪怪地，但睇睇下又慣咗，同時亦好佩服佢地咁有心機！
星期日入園玩嘅時候，響 樂園中央廣場 只係見到一個美麗嘅紅色花圃；去到活動開始當日，米奇、米妮、唐老鴨、黛絲 嘅雕像出現咗啦！佢地嘅中間仲有一棵好靚嘅閃紫色水晶聖誕樹！
我個人係好鍾意 米奇家族 今年嗰套聖誕新裝嘅，係好華麗嘅紫色，另外亦都有好多細緻嘅花紋！樂園中央廣場 嘅雕像都將四位 迪士尼朋友 套衫整得非常仔細，所以我都好喜歡！我另外亦都覺得 黛絲 凝望自己愛人嘅姿勢好得意！
繼續向前行，黎到 睡公主城堡 前面；同往年一樣，燈柱上都係掛咗一啲聖誕裝飾。又到聖誕節，又見到平淡嘅城堡，又再好掛住昔日夢幻嘅 星閃城堡...
咁除咗 美國小鎮大街，其他主題園區又有冇聖誕佈置呢？穿過城堡，行到去 反斗奇兵大本營！咦，點解入口通道多咗啲野嘅？「Andy's Theater」安仔劇場？今年聖誕節，安仔 決定響自己嘅後花園設置一個小劇場，呢到將會上演有趣嘅玩偶表演！
劇場上面掛咗一啲聖誕燈飾，兩邊分別係 安仔 親自繪畫嘅 胡迪、巴斯光年 畫作；旁邊仲有「Stage Door」、「Green Room」標示，安仔 好細心咁為自己嘅劇場整咗後台設備！
睇下劇場裡面，內裡有一個布幕，係我地非常熟悉嘅《反斗奇兵》藍天白雲背景！中間仲有一個由書架組成嘅平台，應該係俾玩偶響上面進行演出嘅！假如有機會的話，不妨留意下書架入面啲書，我覺得有啲書名都幾趣緻！
呢個 安仔劇場 原本係一個紙皮箱黎嘅，睇黎 安仔 都幾鍾意利用紙皮箱等自己可以成為一位小建築家喎！劇場側面都有電腦條碼、膠紙、貨品特性標籤等等。
繼續向前行，走到去 迷離莊園，呢個園區首次加入節慶活動行列！亨利爵士 特別邀請咗一個皮影劇團黎到莊園，響聖誕節期間為訪客呈獻皮影戲表演！佢仲吩咐咗管家響貨運站設置表演劇場！
貨運站嘅月台架起咗一個表演箱，行前少少望真啲，表演箱底部有一個 迷離大宅「MM」標誌，亦有一啲皮影戲圖案。印象中我係未睇過皮影戲嘅，所以我都幾期待呢個演出！
為配合呢個臨時設置嘅皮影劇場，迷離莊園貨運站 都需要暫時停用；咁樣 亨利爵士 咪冇得接收新嘅珍藏品？佢同 阿拔 會唔會收唔到聖誕禮物架？
最後一站黎到 灰熊山谷！呢個大福小鎮嘅居民打算為大家獻上 灰熊手偶劇場！同平時一樣，演出係響 幸運黃金石小食亭 旁邊嘅馬車進行，而嗰個位置都已經掛咗一啲聖誕星星響到！
其實我本身就覺得西部小鎮過聖誕會係一個非常特別嘅情景，可惜今次單單幾粒聖誕星星嘅效果就比較薄弱... 惟有將我嘅寄望放響手偶表演嗰到啦！
沒有留言:
張貼留言