2013年11月3日 - Tho's Dreams 兩週年!

兩年前，2011年11月3日，一位熱愛 迪士尼 嘅男孩作出一個決定，就係想利用網誌將自己嘅所見所聞、生活點滴同所有人分享！黎到今日，呢個網誌經已黎到兩週年紀念日；再一次要感謝各位網友支持，因為你地，Tho's Dreams 響呢兩年間經已累積咗二十五萬瀏覽次數！我真係好開心，有咁多人願意睇我寫野，願意去感受我對 迪士尼 嘅愛！

Tho's Dreams 今年有一個大改變，就係逼於無奈地需要搬家...  不過唔緊要，整個搬家過程經已完成得七七八八，而家可以照樣響呢個新屋企慶祝兩週年！黎到呢個大日子，Tho's Dreams 網誌以及專頁經已換上全新兩週年背景，以 迷離莊園 做主題；因為我覺得過去一年間最深刻嘅事，正正就係呢個新園區開幕！唔知大家留唔留意到，兩週年標誌仲有一啲音樂星塵呢！

慶祝兩週年之餘，我亦趁住今日同大家分享下 Tho's Dreams 嘅未來大計！其實，我一直都有為自己嘅網誌計劃過好多野，可惜因為種種原因 ( 最主要係因為自己懶，哈哈！)，呢啲計劃往往都會被不斷推遲...  不過我都好希望自己可以重拾熱誠，為大家帶來更多不同類別嘅新文章！好，而家就介紹遲啲 Tho's Dreams 將會有咩事發生啦！

迪士尼黑色世界2013 剛剛響上星期四完結咗，但係我就仲有幾篇專題文章係未推出嘅，當時就包括咗 夜光鬼魅巡遊 相片特輯！我預計會響黎緊嘅呢一個星期寫好佢地，為今年嘅萬聖節活動劃上完美嘅句號！

迪士尼黑色世界2013 完結，代表著另一個活動好快又會登場，就係 迪士尼雪亮聖誕2013！雖然暫時就未有活動嘅詳細資料，但每逢黎到聖誕活動，園內都會滿佈溫馨嘅感覺，所以我都非常期待呢個活動！Tho's Dreams 將會同大家一齊渡過一個充滿氣氛嘅節日！

有一樣野我發現自己就快已經拖足半年...  就係 東京迪士尼之旅2013！響暑假期間，我就用故事型式分享我嘅 幸福童話之旅；其實我係有後悔過，因為要寫故事，令到進度大降...  去到呢一刻，仲有好多 東京迪士尼渡假區 嘅相關文章等緊出世！我會儘量快啲寫好！

黎緊，Tho's Dreams 將會有一個新嘅文章分類登場，名為「樂園探索處處尋」。睇到個名，會唔會有一種似曾相識嘅感覺？點解咁似「樂園事物仔細尋」嘅？因為呢個新分類係由「事物仔細尋」引伸出黎嘅，平時入園玩不時都會見到啲得意嘅小裝飾，但又覺得未至於要出一篇「事物仔細尋」去講；於是，我就有一個新諗法，就係推出呢個「探索處處尋」分類！呢個全新嘅文章分類將會加入互動元素，大家都可以一齊進行探索樂園嘅任務！究竟呢個分類會有咩搞作？敬請拭目以待！

較早前，有一個新嘅文章分類出現於 Tho's Dreams，叫做「想像‧帶動魔法」。其實，我響暑假嗰陣經已神不知鬼不覺咁幫佢改咗名，叫做「想像‧創造魔法」。點解會有呢個小改動呢？原先，呢個分類主要係用黎探討一啲 迪士尼主題公園、迪士尼幻想工程 嘅概念，但而家，我同我嘅好朋友將會合作，嘗試親自創作一啲我地夢想中嘅遊樂體驗！第一個項目，將會同以下呢張相片有關，不過就請恕我需要賣一賣關子，暫時唔能夠透露更多詳情...  都係嗰句，敬請拭目以待！哈！

剛剛先至寫完一個萬聖節主題故事，事實上，響寫《黑色異幻》之前，我早就已經有一個新嘅長篇故事構思，以 香港迪士尼樂園 七大園區做題材，只係我一直都未有打算開始寫。雖然我本身係鍾意寫故事，但係寫作嘅過程都幾艱巨，需要花上好多心機、精神、創意，先至可以寫好一篇完整嘅故事...  亦因為咁，或者呢個計劃會比較遲少少先至會實行...

最後，同大家隆重宣佈，我經已正在籌備 東京迪士尼之旅2014，下年將會再次暢遊 東京迪士尼渡假區！( 今年嗰啲文章都未寫完，就已經話下年會再去，都幾諷刺... ) 其實呢一刻都存在著唔少變數，未知去唔去得成；但係我相信，只要有決心，一定可以再次經歷一個帶有幸福歡樂嘅旅行！點都好，而家就等我暫時期待住先啦！

除咗 東京迪士尼之旅2014，我下年都仲有另一個神秘之旅...  雖則現階段都仲係處於非常初步嘅階段，但假如去得成嘅話，一定會開心死我！淨係諗都已經覺得興奮，嘿嘿！睇黎2014年不論對於我自己抑或對於 Tho's Dreams，都會係非常重大嘅一年！好似有啲言之過早，不過都誠邀大家同我一齊見證充滿奇妙嘅一年！我會繼續努力寫多啲有趣文章，將歡樂從 Tho's Dreams 散播開去！希望各位讀者可以繼續多多支持啦，感謝大家！