之前出得好少文章，最後就搞到埋積咗好多原先想出嘅專題冇出到；除咗 東京迪士尼之旅2013，我打算稍後會逐步寫返嗰堆文章，而今日就出咗其中一篇先啦！
好似好耐都冇出過一啲「隨想隨寫」同 迪士尼 冇關嘅文章，咁今日就暫時撇開 迪士尼，同大家分享一篇關於 LEGO 嘅文章！
上年暑假，LEGO 響某個購物商場舉辦 「Piece of Peace」世界遺產積木展。我曾經有提及過，我由細到大都好鍾意砌 LEGO；另一方面，我亦係一個好嚮往自由自在去旅行，見識各地文化嘅人；咁究竟，當兩樣我嘅喜好組合起上黎，又會係點嘅呢？
黎到展覽場地，首先見到一個用積木砌成嘅地球；下面有好多 LEGO人仔 Minifigures，象徵世界和平，貫徹返展覽主題。
呢到放咗好多世界遺產模型，全部都係由積木砌成。響我眼前有兩座塔，其中一座係我細個嘅時候去過嘅 法國巴黎鐵塔，另一個就係我都幾想去睇下嘅 意大利比薩斜塔。
響成長嘅過程中，我好有幸可以去過好多不同國家旅行，到訪過好多名勝；不如就等我睇下，呢個展覽裡面有邊啲世界遺產係我去過嘅先！
英國 倫敦塔
澳洲 悉尼歌劇院
中國 萬里長城
日本 白川鄉聚落
其實總共展出咗40個世界遺產，不過我就冇影哂咁多個，主要係影我有去過嘅，同埋我將來想去嘅。以下就係一啲假如有機會的話，我都好想親身去睇下嘅世界遺產。
日本 姬路城
日本 金閣寺
尼泊爾 加德滿都谷地
印度 泰姬陵
俄羅斯 克里姆林宮
希臘 雅典衛城
意大利 羅馬鬥獸場
秘魯 馬丘比丘
智利 復活島國家公園
埃及 古金字塔
埃及金字塔可以話係咁多個遺產當中最想去嘅一個，我由細細個開始就對呢個古老文明好好奇，覺得佢好神秘！呢個模型上面仲有一個 法老王Minifigure，好趣緻！
呢篇文章嘅最尾，我想用日本嘅富士山作結；原來佢係2013年6月22日先至正式被列為世界文化遺產，呢個模型可以話係新鮮出爐！
山頂上都有一個 Minifigure！但係睇真啲，佢身上所穿著嘅係機場職員制服，點解會有一位機場職員響山頂出現咁搞笑嘅？哈哈！
去旅行真係一樣好開心嘅事，可以拋開平日嘅束縛之餘，更加可以擴闊眼界！唔知道，我響未來會唔會有機會去以上嘅世界遺產參觀呢？
沒有留言:
張貼留言