東京迪士尼海洋海景酒店, 華麗的意式房間!

咁就響 東京迪士尼海洋 玩足一整日，黎到晚上10:00，樂園嘅開放時間結束啦！園內響起閉園廣播，周圍已經再見唔到日間嘅人群；我響咁寧靜嘅環境底下影咗一張夜景相片，之後就開始行返去 東京迪士尼海洋海景酒店，返房休息。

由 美國海濱 行到去 地中海港灣，呢到有一個入口可以直接俾住客來往樂園同埋酒店，非常方便。

建築物嘅外牆都有一個標示「Hotel Miracosta」宇樣嘅霓虹燈。

一入到去酒店，發現又有一幅 東京迪士尼海洋 嘅地圖畫作！

其實下午嘅時候已經登記入住，拎咗房卡；配合 米奇和Duffy的春日巡航 特別活動，房卡都轉咗設計，而家就拎住張咁靚嘅房卡返房啦！

我訂嘅呢間房有兩張單人床，另外仲可以拉出一張附加床，最多可以容納三位成人。

客房佈置華麗，充滿古典風情，連張梳化都設計得精緻過人。

房間有一隻窗，窗旁有椅桌，可以坐低慢慢欣賞窗外嘅景色。

呢間房對正樂園正門廣場，亦見到後面嘅 迪士尼渡假區線 車站，再望遠啲甚至可以望到渡假區外嘅都市建築物。

以下係日間相片，更加清楚睇到酒店嘅其餘結構。之前都提及過 東京迪士尼海洋海景酒店 係以古典意大利做主題，所以建築物外觀都用咗意大利風格。

望出窗外見到正門廣場嘅地球噴水池，但我覺得比較可惜嘅係，噴水池前方嘅 米奇魔法帽 竟然俾一座塔遮住咗！睇唔到我最愛嘅魔法帽，嗚嗚...

除咗建築物外牆，房間裡面嘅裝飾都充分表現出意大利風格；先有兩幅展現意大利海灣嘅畫作。

之後亦有一個木造雕刻，顯示著名嘅意大利水鄉：威尼斯。

繼續睇下其他裝飾！房內有一塊鏡，酒店房間有鏡係一件非常正常嘅事，但唔好忘記呢間係一間 迪士尼酒店！呢塊鏡其實暗藏玄機！

響鏡框嗰到，隱藏咗兩位 迪士尼朋友，黎自《木偶奇遇記》嘅 Figaro、Cleo！

睇黎，呢間房有好多有趣嘅野等緊我發掘喎！咁又睇下牆紙先！

再次有《木偶奇遇記》嘅 迪士尼朋友，木匠 Geppetto、小木偶 Pinocchio、蟋蟀 Jiminy。

另一款牆紙都有隱藏 迪士尼朋友，就咁睇呢張相，你見唔見到有咩 迪士尼朋友 呢？

依然係《木偶奇遇記》，或者你會問，點解全間房都係佢地？其實，《木偶奇遇記》原先係一個意大利童話黎嘅，所以呢班角色就出現咗響呢間意大利風格嘅房間裡面。

呢幅牆紙有更多角色，包括仙女 Blue Fairy，奸角 Honest John、Gideon，以及響電影中被變成驢仔嘅 Lampwick。

睇完牆上嘅隱藏 迪士尼朋友，望向地下，地毯都印有 隱藏米奇！

走進浴室，又再遇上 Cleo，響我涼沖嘅時候，佢都響自己個魚缸一齊沖涼，哈！

講起浴室，就要講埋佢地嘅梳洗用品；我原先以為呢堆用品都會換上春日巡航設計，點知，係冇架...

不過唔緊要啦，呢個設計都好靚，係船長 米奇 響出海之前向愛人道別！

拖鞋，可以話係酒店房間必備嘅！呢間房分別有大人、兒童拖鞋，大人拖鞋係純白色嘅，反而兒童拖鞋就係綠色，上面印有不同標誌，更為特別！

整間酒店房間都有唔少住客專享嘅紀念品，可以拎走留念，其中有一個係紙袋。一面印有三間 迪士尼酒店 嘅圖片，呢一面就係三十週年慶典嘅圖片！

除此之外，仲有三張明信片，有兩張係 東京迪士尼海洋海景酒店。

其餘嗰張係三十週年慶典 迪士尼酒店 獨家特別版明信片！

同樣係酒店房間必備嘅野：信紙套裝。

搞咗一大輪，睇多陣電視好訓啦，如果唔係聽日會唔夠精神玩...  前一晚間酒店有 東京迪士尼渡假區 資訊頻道，黎到 迪士尼 主場，當然都有啦！

仲有日本本地嘅 Disney Channel；小朋友有得睇一定會好開心，我有得睇都好開心！嘻嘻！

好啦，係時候同 Duffy、Oswald 上床訓覺，聽日早上繼續響 東京迪士尼海洋 玩，下午就轉過去 東京迪士尼樂園！