入夜之後，睇完 Fantasmic! 同埋煙花，響 東京迪士尼海洋 仲有咩好做？呢一晚，我選擇咗進行一場尋寶遊戲！配合 東京迪士尼渡假區 嘅三十週年慶典，東京迪士尼海洋 各個園區分別設置咗幾個特別嘅裝飾，我叫佢地做 幸福歡樂能量點！
其實，響日間都可以去呢幾個能量點，不過因為佢地嘅賣點係會閃閃發光，必然要響夜晚先可以睇得清楚，所以我最後就決定夜晚先去搵呢啲裝飾！
樂園指南上面有清楚顯示各個 幸福歡樂能量點 嘅位置，我第一個去到嘅係位於 發現港 嘅能量點！呢個裝飾以 米奇頭形汽球 做主題，汽球嘅出現更加令到園內嘅設施都升上半空啊！響呢到被升上半空嘅係一台飲水機！整個裝飾底下有兩個感應器，究竟點先可以啟動幸福歡樂能量？
其中一個感應器顯示手掌圖案，於是我就將手掌放上去；響呢一刻，裝飾嘅部份燈光亮起啦！但係仲有其餘部份未亮起喎... 仲差啲咩野呢？
係時候要為大家介紹一個有趣嘅裝置：幸福歡樂啟動器！園內各間商店都有售賣呢個啟動器，呢個裝置響不同嘅 幸福歡樂能量點 將會發揮重大作用！
幸福歡樂能量點 底下嘅另一個感應器，係特別設計俾 幸福歡樂啟動器 嘅；好，等我將自己嘅啟動器放上去，睇下會有咩事發生先！
放好之後，按一下啟動器上面嘅按鈕，一聲歡樂嘅音樂隨即響起，裝飾嘅部份燈光亦都再一次亮起！不過，能量似乎仍然未足夠喎... 點算好呢？
我明白啦！等我將手掌、啟動器同時放響 幸福歡樂能量點 嘅兩個感應器，組合兩邊嘅能量先！終於，幸福歡樂能量點 得到足夠能量，完美地發出光芒啦！
幸福歡樂啟動器 除咗可以啟動能量之外，仲有額外一個功能：響 幸福歡樂能量點 成功啟動過後，啟動器亦會將部份能量收集起黎。睇下，五個識別燈之中嘅其中一個已經亮起咗啦！咁即係話，去哂 東京迪士尼海洋 裡面嘅五個 幸福歡樂能量點，就可以令五個識別燈全部亮起！
事不延遲，即刻去搵其他 幸福歡樂能量點！以下係其餘四個能量點嘅所在園區：失落河三角洲 長椅被升起、阿拉伯海岸 盆栽被升起、美人魚礁湖 燈柱被升起、神秘島 垃圾箱被升起。
幸福歡樂啟動器 五個識別燈都著咗啦！咁有咩作用呢？尋寶過後，去到某幾間指定嘅商店，出示自己嘅啟動器，演藝人員就會送上一份小禮物，作為幫忙收集幸福歡樂能量嘅報酬！當接過禮物之後，演藝人員亦會響啟動器嘅遊玩說明書上面蓋印，表示已經完成今次嘅任務！
呢份小禮物係一個徽章掛飾，上面有 米奇造型汽球、米妮造型汽球 以及三十週年標誌。同平時我地買嗰啲徽章最唔同嘅係，呢個掛飾背後嘅唔係釘針，而係一個扣，可以扣響 幸福歡樂啟動器 嘅掛繩上面。
講多少少關於 幸福歡樂啟動器 嘅資料啦，佢嘅設計以 米奇 嘅三十週年服飾作為藍本；整個啟動器以金色為主，中間有一頂黃金高帽，並印有汽球圖案同埋三十週年標誌。反過去背後，再次有三十週年標誌，另外亦有一個按鈕，按一下就可以拆走掛繩。
底部有一個模式調校制，有「OFF」關閉，同埋「P」、「S」兩種模式。「P」模式就即係剛才所介紹嘅啟動模式，每次啟動幸福歡樂能量，燈光會亮起、響起三十週年主題曲 Happiness Is Here 以及一段 米奇 嘅話語。至於「S」模式就會持續發光，令啟動器變成一個得意嘅夜間飾物。
順帶一提，另一邊嘅 東京迪士尼樂園 同樣設置咗五個 幸福歡樂能量點，可以使用同一個啟動器啟動能量，但係就冇得拎多一份禮物嘅。可惜嘅係，我竟然唔記得咗影低嗰邊嘅所有能量點，只係影咗其中一個... 不過說實話，我就覺得 東京迪士尼海洋 嘅能量點係設計得靚啲嘅...
其實我真係好佩服 東京迪士尼渡假區 嘅策略，佢地整一樣野出黎可以達到好多目的：一，慶祝三十週年；二，作為拍照景點；三，進行互動遊戲；四，銷售商品。原先，呢啲能量點可以只係純粹幾個好靚嘅裝飾，但只要諗多少少、做多少少，整件事經已變得完全不同！
沒有留言:
張貼留言