登上蒸汽船, 環繞整個 東京迪士尼海洋!

上回提要：身處於 東京迪士尼海洋 嘅第二日，一朝早就欣賞咗酒店外圍、樂園正門廣場裝飾，去到樂園裡面就玩咗一項非常休閒舒適嘅遊樂設施！我上次所講嘅，其實就係，迪士尼海洋渡輪航線 DisneySea Transit Steamer Line！

上船之前先做個簡介啦，迪士尼海洋渡輪航線 就仿如我地嘅 香港迪士尼樂園鐵路，可以帶賓客環繞整個樂園一周；渡輪航線一共有三個碼頭，分別位於 美國海濱、失落河三角洲 以及 地中海港灣。

值得一提嘅係，迪士尼海洋渡輪航線 係有兩種運作模式；一種係不停站遊園一周，響邊個碼頭上船就會響返同一個碼頭落船；另一種就係單程行走，上船後必須要響下一個碼頭落船。各個碼頭嘅入口都有顯示路線圖以及現時嘅運作模式，上船之前記得要睇清楚啦！

呢一日入咗樂園之後，我就唔知點解好自然地行咗去我稱為「Duffy基地」嘅 Cape Cod；而咁啱，迪士尼海洋渡輪航線 美國海濱碼頭 就係響 Cape Cod，於是我就上船啦！

配合正在舉行嘅 米奇和Duffy的春日巡航 活動，渡輪都有特別裝飾，並且有活動標誌！

迪士尼海洋渡輪航線 所使用嘅船隻係蒸汽船黎嘅；船上可以見到蒸汽機、燒煤鍋爐。

啟航啦！首先出現響眼前嘅，就係停泊響 美國海濱 嘅巨型郵輪，S. S. Columbia！

跟住就可以用另一個角度欣賞 Cape Cod 漁港！仲有 Prometheus火山 做背景添！

下一個經過嘅園區係 發現港，呢個未來港口有好多先進嘅船隻以及航海設備呢！

再之後，渡輪先後經過 失落河三角洲、阿拉伯海岸、美人魚礁湖，跟住就去到 神秘島。

最後一個駛經嘅園區係 地中海港灣，途中可以見到遠處嘅意大利建築群，海面上亦有另一架渡輪！

行駛咗一圈再次黎到 美國海濱，結構龐大嘅 驚魂古塔 即時吸引咗我嘅目光！

終於返到原本上船嘅 Cape Cod 碼頭，落船之後要上樓梯離開，唔知上面有咩睇呢？

先前有文章介紹過，Cape Cod 係一個漁村黎嘅，居民都係以捕魚維生。由碼頭行上去，原來係一間罐頭製造廠，漁民會將漁獲即時拎黎製造罐頭；方便之餘亦有品質保證，哈哈！

最後，向我所乘坐嘅渡輪講聲再見啦！多謝你帶領我響海上環繞咗整個 東京迪士尼海洋！

有一樣野唔記得講：唔知係唔係太早嘅關係，成架船其實得我一個乘客，我可以好寧靜咁享受一趙海上之旅！能夠靜靜地、舒舒服服咁響船上欣賞各個園區嘅景色，可以話係新一日嘅好開始！