海洋廣場, 被幸福歡樂包圍的魔法帽!

東京迪士尼渡假區 旅程第二日，又再踏進 東京迪士尼海洋。呢一日同樣有得使用酒店住客專用隊列入場，可以提前響樂園開放前20分鐘進入園內。尋日，我就第一時間衝咗去人氣遊樂設施，Toy Story Mania。今日，我選擇放慢腳步，停留響樂園嘅入口廣場。

留咗響入口廣場，只有一個原因，就係呢到有一個好靚嘅 三十週年慶典 裝飾。東京迪士尼之旅2012 嘅時候就分享過，東京迪士尼海洋 嘅入口廣場放咗一頂 米奇魔法帽，係響2011年 東京迪士尼海洋 十週年 嗰陣新增嘅。黎到2013年，呢頂魔法帽就被幸福歡樂能量包圍住！

穿著黃金服飾嘅 米奇、米妮，手執象徵歡樂嘅 米奇頭形快樂汽球，準備升上半空！整個裝飾金光閃閃，吸引咗唔少人排隊影相，包括我。日間睇已經覺得好靚，但其實，入夜之後將會變得更加夢幻！以下呢張相係我響第一晚影嘅，一點點燈光閃爍著，幻麗迷人！

2012年嘅時候，魔法帽嘅頂端有 魔法師米奇 企咗響上面；今次去嘅時候，佢已經唔見咗，代而代之嘅係剛才所提及嘅 三十週年慶典 相關裝飾。除咗 米奇頭形快樂汽球，同樣象徵歡樂嘅仲有 幸福歡樂彩帶，魔法帽嘅周邊都出現咗好多彩帶！

魔法帽位於入口廣場嘅正中央，自然成為咗焦點；但唔好唔記得仔細留意埋廣場嘅其餘部份，都仲有另一啲 三十週年慶典 裝飾！而家鏡頭轉到去 東京迪士尼海洋 嘅售票區，咦，呢到好似冇咩特別咋喎，有咩睇啊？

實情係響外面嘅屋簷嗰到，呢個位置貼有 三十週年慶典 橫幅，展示不同嘅 迪士尼朋友 坐咗響 米奇頭形快樂汽球 上面，同時亦有 三十週年慶典 標誌。

睇完入口廣場嘅裝飾，繼續暢遊 東京迪士尼海洋！響第一日嘅行程，大部份我想玩嘅遊樂設施、我想睇嘅表演都已經睇得七七八八，所以呢一日我可以唔洗咁匆忙！我之後的確玩咗一項非常休閒舒適嘅遊樂設施！係咩呢？下篇文章繼續！