今日將會有一連兩篇文章同大家分享 香港迪士尼樂園 近期嘅主題商品，而家就首先講下農曆新年主題商品啦！每次黎到農曆新年，都必然要辦下年貨，將福氣帶返屋企！今年，Duffy迪士尼小熊 成為咗農曆新年活動嘅重點人物，好多種類嘅商品都可以見到佢嘅蹤影！
園方響今個新春特別為 Duffy迪士尼小熊 設計咗全新嘅新年服飾，而最驚喜嘅係，佢地亦都首次自家推出 小Duffy毛公仔、Duffy小熊鎖匙扣！
園內不時都會發售 小Duffy毛公仔，但以往都係由美國嘅 迪士尼主題公園 直接運過黎賣；今次呢隻 農曆新年小Duffy 係第一隻香港出品嘅 小Duffy毛公仔，可以話係一個新嘗試！
而呢一隻 農曆新年Duffy鎖匙扣，除咗係香港出品，更加係 香港迪士尼樂園 首次推出穿著服飾嘅 Duffy小熊鎖匙扣！相信，未來將會有更多穿著不同服飾嘅 Duffy小熊鎖匙扣 登場！
不過，我覺得美中不足嘅係，呢隻 農曆新年Duffy鎖匙扣 採用咗金屬匙圈；假如可以用返扣針、鐵珠扣圈，整體感覺應該會更加好。
每凡購買一隻全新嘅 Duffy迪士尼小熊，都會附上一本故事冊；當然，佢地兩個都有附上故事冊啦！佢地嘅腳上亦有 Duffy迪士尼小熊 招牌，而中式褲上面就有 米奇頭型圖案。
農曆新年要為自己嘅屋企裝飾一番，唔少得嘅係揮春！以下呢個立體揮春，由 Duffy迪士尼小熊 做主角，佢將會令你響新一年如意吉祥！
其實，農曆新年一向都係我響園內買得最少野嘅節日，我通常都唔會買太多野；最後要介紹嘅農曆新年商品，係兩個限量版徽章。
其中一個徽章，外型係一個金色嘅畫框，框內嘅畫作展現一眾 迪士尼朋友 慶祝馬年嘅情境！再睇真啲啲，Duffy迪士尼小熊 又再出現呢！
至於另一個徽章係 奇妙處處通 會員專享嘅，上面有三位 迪士尼朋友，分別係 米奇老鼠、米妮老鼠、Duffy迪士尼小熊；徽章上面亦有「2014」字樣、馬匹圖案，仲有可以旋轉嘅 米奇「福」字標誌！
聽日就係 香港迪士尼樂園 農曆新年活動嘅最後一日，活動期間你有冇入園感受福氣呢？我仲有好幾篇關於呢個活動嘅文章未出，遲啲再同大家分享！
沒有留言:
張貼留言