迪士尼星級款待 呢個活動向來都係主打收費嘅星級體驗,黎到今年,園方全新推出 Duffy甜品教室,讓一眾 Duffy迪士尼小熊 Fans們嘗試親自裝飾蛋糕!相信各位讀者都知道我係超級超級鍾意 Duffy,所以響 迪士尼星級款待 開始後嘅星期六,我已經參加咗呢項星級體驗!
Duffy甜品教室 於 迪士尼好萊塢酒店 進行,所以又搭穿梭巴士過去!
正式開始裝飾蛋糕之前,參加者可以首先響 影廠酒廊 享用下午茶餐。
下午茶餐包括:吉列炸蝦、雞肉卷、芒果三文魚多士等等,都幾豐富喎!
亦都唔好忘記,呢到係 迪士尼酒店,食食下茶點都可以見到 米奇老鼠!
食完野就嘆返杯茶先!我嘅 迷你廚師Duffy 都想試飲喎!
之後,甜品教室嘅餘下部份會移至 米奇廚師餐廳 進行;參加者們都搖身一變,變成廚師!
著好圍裙、戴好廚師帽,睇下枱面上嘅蛋糕材料;首先係忌廉、栗子蓉。
蛋糕類型分兩款,一款係原味蛋糕,另一款係 米奇頭型 朱古力蛋糕。
其實仲有其他材料,但因為趕住開始,我影唔哂... 至於製作過程我就唔詳細講啦,大部份時間都係要好有耐性咁慢慢將忌廉、栗子蓉唧響蛋糕上面。而全程都會有演藝人員講解、示範,唔會太難嘅。大約一個鐘頭之後,我嘅蛋糕快將完成,最後一步就係將 Duffy 招牌放上去!
搞掂啦!以下就係製成品!我覺得最難係要用朱古力將 Duffy 嘅臉孔畫出黎... 我畫到花哂...
同演藝人員嘅示範作品比較一下先!今次係我第一次整蛋糕,都算係咁啦,哈哈!
整完蛋糕之後,重要嘅時刻來臨啦,就係 Duffy迪士尼小熊 出黎同我地影相啊!
佢知道大家都整咗個同佢個樣一模一樣嘅蛋糕,所以好開心啊!
Duffy甜品教室 黎到尾聲,將蛋糕包裝好,仲有一個好靚嘅掛牌添!
迷你廚師Duffy 話要快啲拎個蛋糕返去同佢嘅哥哥們一齊食,佢好心急!
不過臨走之前都有野要做,每位參加者都會獲贈一張紀念相片,所以要換領埋先走得!
呢張相片設計成畢業證書,證明我成功完成 Duffy甜品教室!
另一方面,整個製作過程都有攝影師不時幫我地影相,啱心水的話亦可以選購額外相片。
相片、圍裙、廚師帽,都有唔少紀念品拎返屋企。
返到去又俾 巨大Duffy 戴下頂廚師帽先,即時成為一位星級大廚!
好啦,食蛋糕!食返自己親手製作嘅作品,果然係特別好味道!
最後講少少感想啦:我一直都唔太鍾意 迪士尼星級款待 呢個活動,因為佢俾我嘅感覺係只有用錢先可以買到奇妙時刻。但同時我亦覺得,假如自己接受到價錢的話,試試亦無妨,因為都係一種體驗黎嘅。參加完 Duffy甜品教室,過程中的確係開心嘅,但我始終希望,呢種感覺並唔係只係響呢種星級體驗項目先至搵得到。因為,奇妙時刻本來就應該係響意想不到嘅時候送上驚喜。
不過我都聽聞,迪士尼星級款待2014 活動開始後,樂園裡面都有唔少有趣嘅奇妙時刻,可以話係一個好消息!遲啲等我搵時間入一入去,唔知會唔會渡過開心奇妙嘅一日呢?
That makes me want to make a Duffy cake,haha:)
回覆刪除今次DUFFY既體驗真係係好吸引!!!
回覆刪除但我覺得今年星級活動, 所有體驗都同錢有關, 好似價錢仲比去年貴左!!
希望有機會可以比復活節EVENT取代啦!!
今年係少咗星級禮遇套裝呢啲門面野, 集中推廣收費嘅星級體驗.
刪除不過, 聽到唔少朋友話園內其實都有好多有趣嘅magical moment, 咁我覺得加返分.
star guest之後幾次入park都覺得其實唔少人, 或者呢個淡季已經唔存在,
繼續咁落去, 或者園方都會開始考慮響呢個期間改為easter event, 希望啦~