今日將會發佈三篇 東京迪士尼樂園 夜間巡遊專題文章！其實點解要分做三篇？咁係因為呢個巡遊實在係太長啦，花車總數超過二十架，所以我就決定將所有花車分咗三個類別！而呢篇文章將會呈獻第一個類別，就係：公主與仙子！
講返少少資料先，呢個巡遊全名叫做「Tokyo Disneyland Electrical Parade: Dreamlights」「東京迪士尼樂園電子巡遊：夢之光」，每晚都會響巡遊路線上演；但假如落雨的話，就會改做規模細好多嘅迷你巡遊「Nightfall Glow」「夜幕彩輝」。
2012年去嗰陣，就係因為落雨，我冇機會睇到呢個咁靚嘅夜間巡遊；黎到 東京迪士尼之旅2013，嗰幾日都有間唔中落下雨，所以我都有啲擔心會唔會又冇得睇；好彩嘅係入夜之後都無再落雨，夜間巡遊照常進行，見到首架花車出嚟嘅嗰一刻，我真係好興奮！
而家，就等我同大家介紹每一架花車啦！為咗唔破壞現場嘅燈光效果，我整個過程都冇開閃光燈影相，亦因為咁，有部份相片會比較朦糊... 我已經盡量揀一啲最好嘅相片出黎，希望各位見諒！
花車1：藍仙女 身穿長裙，不時拍動蝴蝶翅膀，為巡遊揭開序幕！
花車2：白雪公主 企響閃爍嘅大樹下面，與鳥兒歌唱！
花車3：燈神精靈 出場，施展奇幻變身術！
變變變，精靈 頓時幻化成 妙妙貓、跳跳虎、夏日渡假裝 等不同造型！
花車4：阿拉丁、茉莉公主 身處於皇宮，向所有人揮手打招呼！
其實呢兩架 阿拉丁 主題花車好似唔算係公主分類... 冇所謂啦，有 茉莉公主 響到嘛，哈！
花車5：灰姑娘 夠鐘要去參加舞會，仙女教母 可唔可以幫幫佢呢？
仙女教母 揮動魔法棒，星光閃閃，灰姑娘 變成一位貴族女孩，可以去舞會啦！
花車6、7：舞會過後，王子 手執玻璃鞋，尋覓屬於佢嘅公主。
花車8：之後就係時候進入 奇妙仙子 嘅世界，周圍都係幻麗嘅嘅花草！
奇妙仙子 仲帶埋佢嘅一班仙子朋友黎玩，佢地似乎好開心喎！
第一個分類完結啦，淨係一個分類已經有八架花車，呢個巡遊嘅陣容果然係非常強大！好啦，公主與仙子分類介紹完成，下個分類又會係咩呢？記得今日留意住 Tho's Dreams 啦！
沒有留言:
張貼留言