星期五去完樂園玩，終於有多啲野可以寫啦！今日一次過送上六篇文章，一日寫咁多篇都真係第一次。為免部份文章會未能顯示於首頁中，所以暫時設定了首頁有10篇，下次更新Blog嘅時候會改返做五篇 :)
上幾次入樂園都冇買野返黎，都唔出奇嘅，周不時就入一入去，未必次次都有新產品推出。就算有新產品，都未必啱心水... 不過今次我就買咗一樣野，就係 珍藏卡收藏卡套。假如佢出卡套，我本身都唔會特別想買。但見到個封面咁靚，又唔係貴，最後就買咗啦！雖然 星級貴賓紀念冊 都有呢張圖，但係呢就細好多...
佢個價錢貼紙係顯示$35嘅，但俾錢時部機就顯示$25。我心諗，減咗$10，都唔會再有折扣啦，所以冇拎會員卡出黎。但我拎緊錢嘅時候，收錢嘅演藝人員姐姐見到我銀包入面張卡，就叫我俾埋佢，點知係真係仲有折架！即係只係$20咋！我好耐冇響樂園入面買野嘅時候，會有覺得抵嘅感覺 XD
返到屋企，睇真啲個封面。有小發現！( 星級貴賓紀念冊 張圖真係太細，所以我一直冇研究過。)原來響右邊位置有 Duffy 啊！不過就好細粒，哈哈。
我鍾意呢張圖嘅原因，係因為佢個背景融合了好多不同遊樂設施。我覺得設計者真係好有心機！
內頁係 睡公主城堡，仲有煙花添！
但係唯一唔好嘅地方係，好難先放到啲卡入去。計埋 奇妙處處通 會員專享嘅六張卡，一套十六張珍藏卡已經放左入去啦！其實仲差一張 翠絲 我拎唔到，搵極都搵唔到... 不過已經搵咗網友同我交換，好快就可以「一家團聚」！
其實，我呢排都有其他野睇中架！前排出了 Pooh 新公仔，Piglet 仲趴響佢身上。見到今次啲質地唔錯，所以都有想買嘅衝動。另一方面，星期五時候見到出了全新BB系列公仔。今次仲有一啲比較少出嘅 迪士尼朋友，我記得有 Boo、奇妙仙子、翠絲 等等...仲有 Dumbo 添！搞到我有想買！不過為了慳錢去日本買野，所以暫時都只好忍住唔買...
沒有留言:
張貼留言