之前響網上見到新嗰封續會郵件，好靚好得意！我等咗好耐，好期待呢封郵件嘅寄黎。但係我有個疑問，就係：假如我提早續會，會唔會冇咗封信？因為我今次決定升級為白金卡，今年生日響酒店入面使用有關優惠。既然決定升級，我亦想早少少續會，想早啲用其他折扣優惠。試過響網上問以上問題，但係就都得唔到一個明確答案。上次響樂園入面問，嗰位演藝人員答得好詳細，不過都係確保唔到封信會唔會寄黎。
所以我只好等待呢封信嘅來臨，之後先去續會啦...我張卡會響6月19日到期，原本以為最快要6月頭先會收到呢封郵件；點知，而家只係5月頭，就已經收到了！咁下次可以入去續了！
不論信封面定係信封底，都幾靚。可能你會覺得信封面設計得好簡單，但其實對眼嗰個位係透明架！對眼係來自入面本書仔，所以真係設計得好得意！
一如以往，入面有一本小冊子、一個回郵信封，同埋一張續會表格。( 雖然佢寄張表格黎，不過咁耐以黎，次次都係入去續！XD )
我覺得最矚目嘅，都唔係呢本 彈弓狗 書仔。反而係書仔入面有關三個新擴建園區嘅介紹，因為見到呢個介紹，感覺上就好似快要來臨咁，令我更加期待！
以前都收過有關 全年通行證 續期以及提前轉會嘅郵件。上年個信封同裡面嘅內容，都係配合返 五週年飛躍奇妙 嘅主題。但係以前嗰啲郵件就好可惜地經已唔見咗啦...
其實 奇妙處處通 只係推出了大約一年多少少，但我已經試過三個類別了！一開頭我係買銀卡嘅，因為感覺上係最抵，唔係因為進園日子，而係因為加少少錢，就可以使用比紅卡多好多嘅拆扣，的確係一個唔錯嘅選擇。
之後，因為有一次同爸媽去 迪士尼黑色世界，要用好友同行優惠，但入場限制較多，就只好加錢轉金卡黎增加可入園嘅日子。
剛剛都講過，今次再升級為白金卡，主要係因為生日優惠。事實上，一張白金卡的確唔平，幸運地我係學生先可以平少少。不過，種種不同嘅優惠累積起黎，相信都會值返嘅！
沒有留言:
張貼留言