考完試冇咩特別野做，於是拎返之前啲電腦遊戲出黎玩。好耐之前講過其中一隻好幾鍾意玩嘅電腦遊戲，係興建主題樂園嘅。我仲試過響遊戲入面整咗個翻版 沖天搖控車！
今次，我想分享呢個遊戲，係同宇宙有關嘅，名為 Spore。以下張圖就係響遊戲入面影嘅，呢個只係目錄。連目錄都整得咁靚，真係唔怪得我咁鍾意呢個遊戲！
遊戲入面係模擬一樣物種由一個單細胞慢慢進化... 由細胞、野獸、原始部種、現代城市，再去到最後嘅太空，分了五個時期。你可以自己創作不同嘅物種，但玩法都係一樣嘅。整個遊戲亦設計得非常真實，好有邏輯。呢張相入面嘅係一個城市。
當去到最後嘅太空時期，先至係遊戲嘅重點。你可以探索宇宙、同其他超文明物種溝通、佔領人地個星球... 仲有好多唔同嘅內容，所以真係可以玩到好耐架！以下張相就顯示我身處響一個「熔岩星球」入面。
呢個遊戲都買咗好耐了，之前已經玩完大部份遊戲內容。但係之後部電腦死咗，所以冇哂啲儲存資料，要重頭玩過。呢張相就係當時我去到 宇宙中心 嘅時候影。要去到嗰到真係唔易，因為 宇宙中心 嘅周邊全部都係邪惡聯盟嘅佔領區。當你經過，就會立即有佢地嘅戰機走出黎攻擊。
仲有其他有趣嘅宇宙星體，包括黑洞，能夠將你即時送去一個非常遙遠嘅位置。
遊戲中另一樣得意野，就係可以搵到我地嘅 太陽系！當然，又係唔係咁易搵得到！
呢個遊戲真係值得一讚，仔細得恐怖！因為入面可能有超過一萬個星體！同一時間，有部份玩家仲好有心機地整咗一個遊戲百科，非常詳細地講解遊戲嘅每一個細節。遊戲中亦有一些蘊藏的背後小故事，令佢變得更加神秘！的確係一隻好詳細亦好有心機整出黎嘅遊戲，所以我之前一玩就著迷了！
沒有留言:
張貼留言