昨日去咗樂園，一如以往，報告一下今次穫收獲先！第一個收穫就係，一入到樂園就見到新一期樂園指南！今期封面人物係 大鼻帝帝，今次推出呢一份樂園指南，係要刊登返 米奇水花巡遊 同埋 灰熊山谷 內嘅資料。
同兩年前一樣，都係有 欣賞「米奇水花巡遊」小錦囊。
另外亦已經印有 灰熊山谷 內嘅設施資料，俾試玩日參加者睇。
有樂園指南，當然唔少得樂園時間表！繼續係 米奇！
時間表上亦都有關於 米奇水花巡遊 嘅資料。
昨日早上去 反斗奇兵大本營，想玩 沖天搖控車 時，演藝人員姐姐話未開，我就順便問佢拎貼紙。係我仲未有嘅 胡迪 啊！佢仲俾咗三張我！
下午嘅時候，無意中響 幻想世界 嘅資訊亭搵到 奇妙小錦囊！我入咗樂園好多次都搵唔到！但冇哂繁體中文版，所以仲要再接再厲。
三號風球時，好悶冇野好做，只好影下相拎下貼紙。有一位演藝人員姐姐俾咗一大疊 辛巴 貼紙我！我返到屋企時，好無聊地數下佢，總共係有17張！
最可惜嘅係，搵咗成日都搵唔到仲差佢先齊一套嘅 奇妙仙子 貼紙。不過唔緊要，又已經搵咗網友同我交換，所以冇問題！
沒有留言:
張貼留言