東京迪士尼之旅2012 - 旅程日誌
Day 2 日期：6月8日 (星期五)、地點：山梨 飄零燕莊園
響莊園入面，可以睇到好多種類嘅花。雖然我地去嘅時候都未係最好嘅時機，有部份花圃都未有花，不過都已經好多花可以睇，目不暇給！第一個賞花點就係玫瑰長廊啦，佢係園住一個小山岳而建嘅。
入面掛咗好多唔同顏色嘅玫瑰，令我覺得好驚訝！( 我一直都以為只係得紅色嘅玫瑰，因為我只係見過紅色 -__- )
話說當日嘅天氣都唔錯，都幾適合遊園賞花。
離開玫瑰長廊之後，就黎到一條賞花徑，裡面有多啲品種嘅花。
我個人黎講，覺得白色嘅花係最靚嘅，因為俾我嘅感覺最清純。以下呢張相入面一支支小白花，咁啱仲影到有蜜蜂採花蜜添！
呢個莊園啲園藝都設計得唔錯，好有心思。
返到去小鎮周邊，仲有一層層嘅薰衣茸！
真係有好多好有趣嘅品種，我平時都冇咩機會睇花...
最後一站，就黎到溫室啦。
一入門口就有一大棵枝葉，見啲葉幾靚就影低咗佢。
又有好多有趣嘅花種。
而我覺得最得意嘅就係呢朵又紅又白嘅「士多啤利奶」花，哈哈！
溫室入面有一個小屋模型。
呢到更加開放俾人租黎舉行婚禮，可以見到啲華麗嘅佈置。
盡頭嘅禮台之上仲有一對愛神像。
呢一日主要都係坐車為主，去完呢個莊園就繼續坐車去當晚住嘅酒店啦...
沒有留言:
張貼留言