晚上嘅時候，因為開始夜，加上持續落雨，所以樂園入面少咗好多人。再次去到 明日樂園，見到朝早要排好耐嘅 大賽車場 Grand Circuit Raceway，竟然冇人排隊，所以我就去咗玩下... 而我呢個選擇，係錯誤架...
日頭經過嘅時候，因為真係好多人，加上香港都有 馳車天地，所以只係影咗旁邊嘅 閃電王麥坤。賽車場，當然唔少得佢啦！佢車頭蓋上仲印有 Piston Cup 冠軍標記！
夜晚入去玩嘅時候，亦不忘留意一下等待區有咩得意野。佢地嘅等待區設計到好似一個維修區咁，除咗賽車之外，仲有一大堆維修工具。
維修區入面亦有一塊印有賽道地圖嘅玻璃板。我地 馳車天地 就有三條行車軌，而 東京迪士尼樂園 呢到就係四條。同埋，佢地四條行車道係平排咁跟住賽道黎行，而香港嗰三條係會縱橫交錯。
好，上車啦！點解我會話做咗一個錯誤嘅抉擇呢？其實，落緊雨，我都預咗會濕。但最大問題係，因為賽道比較空曠，所以好大風。我玩完之後，俾風吹到成個凍哂！之後食返個飯先冇咁凍！
不過，就算撇除天氣因素，我都覺得相比起 馳車天地，呢個遊樂設施係冇咁好玩。呢到嘅故事設定係賽車道，賽道周邊除咗一兩個指示牌之外，就已經冇咩好睇，有啲悶。而香港嘅 馳車天地，設定為明日高速公路，周圍有好多樹木同埋特別佈置，個體驗的確係好啲。再加上，呢到啲車個感覺係好舊，行駛途中亦好嘈，相信係用柴油發動。如果時間比較充裕，想消磨一下時間的話，呢個遊樂設施都還可以嘅...
沒有留言:
張貼留言