警告! 此處正遭受不明物體入侵!

黎到 探險樂園 Adventureland 啦，呢到亦即係香港嘅探險世界。咦！有個好高嘅塔喎！仲好有原始風味！就等我入去探索一下啦！

等陣！點解有架太空飛船響到架！好似有啲唔尋常喎...

原來呢到係 提基神殿 The Enchanted Tiki Room，但個牌俾人畫花咗喎...「史迪仔呈獻：Aloha E Komo Mai！」唔知搞邊科呢...

妮露 唔見咗 史迪仔！佢一定係去咗搞搞震啦！

啲木柱上面除咗有 妮露 張標貼之外，仲有啲藍色嘅腳印，唔通...

先唔理啲腳印，睇下周圍嘅佈置先！走廊上面有一個個花籃，好靚！

牆上亦有好靚嘅壁畫，但係俾啲腳印整花咗...

嘩！屋頂嗰到穿咗好大個窿喎！究竟搞咩啊！

入去之前，有位演藝人員姐姐講咗一大堆野，不過又係日文，所以我唔知佢講咩...  入面有啲雀仔響到，周圍亦有一啲花籃同埋圖騰木柱。

呢個神殿入面嘅所有野都係有生命架！佢地一齊唱歌，表演俾我地睇啊！ 最中間有四隻雀仔，佢地就係主音啦！而其他周邊嘅雀仔、花籃，甚至係圖騰，佢地都會唱歌！

響呢個時候，我發現啲窗原來全部都俾人畫花哂...

突然，音樂停咗，全場黑哂。有野響舞台中間走出黎啊！大家都應該估到係邊個啦！就係 史迪仔 啦！

原來佢唔係黎搞搞震架，佢係想一齊唱歌，表演俾大家睇！

睇下佢！彈住木吉他，同雀仔佢地一齊合唱！

我覺得呢個表演好好睇啊！聽歌之餘，又可以見到 史迪仔 搞笑嘅樣！特別係出面啲預告好有心思，等你可以慢慢估下之後會有咩事發生！值得一讚！