西部樂園 - 巨雷下的西部小鎮

講完 動物天地，就講下隔離嘅 西部樂園 Westernland 啦！吓！又係西部？！冇錯，同 灰熊山谷 係同一個主題嘅。事實上，我覺得我地嘅 灰熊山谷 係同時結合咗 動物天地 同埋 西部樂園 嘅元素。因為 西部樂園 呢到主要唔係以動物為題，而 灰熊山谷 就加咗灰熊嘅故事響西部小鎮入面。

以下呢張相係 西部樂園 嘅其中一個入口，響呢個位仲可以見到 灰姑娘城堡。同時，亦可以見到 西部樂園 啲建築物同 灰熊山谷 嗰啲都好相似。大家亦可能會留意到個地面係濕哂，冇錯，嗰日啲雨係由朝早落到夜晚... =_=

標題話巨雷下的西部小鎮。咩叫巨雷下呢？呢到成日行雷？其實巨雷即係呢到好受歡迎嘅遊樂設施，巨雷山 Big Thunder Mountain。呢個都係迪士尼經典遊樂設施黎，除咗香港，世界其他地方嘅迪士尼樂園都有。不過，因為呢個都係重點遊樂設施之一，所以都係留到響較後部份先講。

講下呢個園區內嘅遊樂設施啦！呢到有一個劇院嘅，不過我為咗慳返啲時間，所以冇去睇，只係響門口昅一昅。

呢個劇場係以一班熊為主題嘅，入面可以見到佢地去旅行嘅裝備，有滑浪板同埋滑雪板等等。上面先講完呢個區唔係以動物為題，咁點解又會有一個以熊為題材嘅劇場？其實呢個區響加洲 迪士尼樂園，以前係響 動物天地 入面嘅 ( 而家已經拆咗 )。但響 東京迪士尼樂園 呢到，相信係因為 動物天地 唔夠位而搬咗過黎。

另外亦有一個射擊場，但係要俾錢，我又唔係太感興趣，所以都冇玩。

上一篇文章都有提及到，因為河流區域進行粉飾工作，所以部份遊樂設施暫停。響以下呢張相片就可以見到呢間餐廳嘅周邊有圍板遮住有關位置，其實個範圍都幾大。

呢塊木板就一次過顯示哂河流區域嘅遊樂設施。當然，佢地當日係關閉嘅。當中包括有西部渡輪，可以環繞河流一圈；以及係木筏，同我地香港差唔多，可以去一個島，島上有樹屋，不過就唔係以泰山做主題。

餐廳有露天茶座，如果冇落雨，坐響到食野嘅話，個氣氛應該都唔錯。

園區入面都有好多以西部為題嘅擺設，例如呢隻印第安熊木雕。

西部小鎮入面有一間麵包鋪，店外有一袋袋麵粉。

但係我覺得呢個園區入面最正嘅位並唔係西部小鎮，而係洗手間！洗手間？唔係掛！冇錯，係洗手間，咁係因為通往洗手間嘅通道設計到好似一個礦井咁！

雖然 西部樂園 同埋 灰熊山谷 都係以西部為主題，都差唔多。但 灰熊山谷 勝在有一個原創故事，將灰熊加咗入去，比起純粹西部主題更加有吸引力！