響 東京迪士尼樂園，入口有 米奇花圃 歡迎你嘅到臨；至於黎到 東京迪士尼海洋，就換上 地球噴水池 歡迎你！我地即將要展開一個環遊世界嘅海上之旅，見到呢個地球，覺得好有氣勢啊！
2011年9月4日，係 東京迪士尼海洋 嘅開幕10周年，有大型慶祝活動。慶祝活動名為 Be Magical!，有 魔法師米奇 做主角，佢地響入口加咗一個好靚嘅裝飾。雖然我地去嘅時候，10週年慶祝活動經已完結，但仍然可以見到入口嘅 魔法師米奇。( 原來我生日之後嘅一日就係 東京迪士尼海洋 嘅生日，咁我以後一定會記得！XD )
可以見到我最愛嘅 米奇 造型，魔法師造型，好開心！但其實園方係有修改過個造型，原本個魔法師造型唔係咁樣嘅，不過修改後仲更加有吸引力！
魔法師造型 米奇 係來自電影 Fantasia 嘅，呢到亦可以見到黎自同一部電影嘅 魔法掃把。
我地 香港迪士尼樂園 五週年慶典都係用咗 魔法師米奇 做主角，入口同樣亦有相關佈置；雖然香港嗰個仲大過東京呢邊；但我就都係鍾意東京呢個多啲，你地又鍾意邊一個佈置多啲呢？
沒有留言:
張貼留言