提著行李箱, 加入 Duffy 的春日巡航!

隨著我正式開始分享 東京迪士尼海洋 嘅事物，我亦同步開始介紹響園內買返黎嘅戰利品！其實我響 東京迪士尼海洋 入面買嘅，全部都係 Duffy 相關嘅系列商品！特別係園方為 米奇和Duffy的春日巡航 特別活動推出咗好多節日限定商品！

其中，今次活動嘅其中一個象徵標誌就係行李箱，冇行李箱又點樣出發去旅行呢？屬於 米奇 的藍色行李箱上，有不同嘅布章，全部都係 東京迪士尼海洋 入面嘅景點黎架！真嘅行李箱就冇得買，不過就有一個跟返呢個行李箱設計嘅手袋賣。

袋上仲掛咗一個寫住 Mickey Mouse 個名嘅行李牌。

而袋入面就係淺藍色嘅，印有好多精美嘅圖案，有好多 Duffy！

事實上，呢個手袋買咗返黎咁耐，我都唔知有咩用，我又唔會拎出街嘅。回想返當時嘅情況，我諗係因為響園內太興奮，佢又幾靚，見人買我就買埋一份...  或者之後可以特別用黎裝哂所有 Duffy 嘅服飾... ( 而家啲服飾我係亂咁放！)

至於以下落黎呢個袋，對我黎講係實用性高啲，但其實都冇咩機會成日用。呢個係一個巨型環保袋，因為實在買得太多野，我原本個行李箱裝唔哂；而呢個環保袋就可以幫我裝到好多野，我上機時都係拎住佢架！

為咗俾大家體驗得到呢個袋有幾大，我邀請咗 大Duffy 做特別嘉賓，可以睇得到個對比。

今次呢個行李箱造型袋真係設計得幾靚，我響兩個樂園都見到有人拎住。我仲試過響 香港迪士尼樂園 入面，見過有日本遊客拎住個大環保袋！果然係好高人氣！