地中海港灣 - 進入海洋中心的必經之路

欣賞完 東京迪士尼海洋 正門嘅佈置之後，就繼續向前進發啦！行前幾步，我地即時黎到咗一個建築物林立嘅小鎮，但其實呢啲建築物入面係一間酒店黎！佢地嘅 東京迪士尼海洋觀海景大酒店 Tokyo DisneySea Hotel Miracosta 係融入響樂園入面嘅。

響正中心位置，有一個 米奇和Duffy的春日巡航 活動標誌響到，仲係彩色架！

響建築物嘅底下穿過去，就去到港灣嗰邊啦！近住入口嘅呢個園區，叫做 地中海港灣 Mediterranean Harbour，所以周圍都充滿地中海風情。

海港呢邊有有一個廣場，會有 迪士尼朋友 出黎同大家見面，佢地真係好自由，可以周圍走。( 唔計巡遊同埋表演，我終於都影到 迪士尼朋友 啦！XD )

當然唔少得遊樂設施及表演資訊版。用木板展示，同 東京迪士尼樂園 嗰邊都係冇電子化。

終於見到港灣嘅真面目，最搶眼嘅就係樂園地標 火山 Mount Prometheus。

正當我地黎到海岸之際，有一架 迪士尼海洋渡輪航線 DisneySea Transit Steamer Line 嘅船喎！坐呢啲船，可以環繞整個樂園一周，不同園區都設有碼頭，可以上船。但係因為時間所限，我地到訪當日並冇坐到呢架船...

但係呢架船好似有啲唔尋常喎... 不斷響到兜黎兜去嘅...？原來，米奇、米妮、Duffy、ShellieMay 都響呢架船上面，向大家揮手啊！

其實佢地係表演緊架！呢個係春日活動嘅特別表演，春臨里多島 Lido Isle Welcom To Spring。佢地四個就係坐呢個船出場，之後會上岸同大家一齊跳舞！但係跳舞嗰個位一早已經好多人圍住，所以只係勉強睇到少少，影唔到相...

繼續講返呢個主題園區先，響下午我搵郵筒寄明信片嘅時候，我走咗入呢條後巷。

之後又黎到呢個好似小花園咁嘅地方，周圍個感覺都好優閒，好舒服。

東京迪士尼海洋 入面真係有好多不同種類嘅船，除咗渡輪航線之外，呢個園區嘅一個角落仲有 威尼斯貢多拉遊船 Venetian Gondolas，不過我冇特別去睇。

而家諗返轉頭，由於下午4:30就要走，為了要玩哂所有重點遊樂設施，有好多其他嘅遊樂設施同表演，甚至係海上巡遊，我地都冇玩到或者睇到。不過我覺得最唔抵嘅係冇得睇夜景，因為每一個迪士尼主題公園嘅夜景真係非常迷人架！但我當初就揀咗響 東京迪士尼樂園 玩一整天，而 東京迪士尼海洋 就玩半天，所以冇得怨嘅...下次再有機會到訪 東京迪士尼海洋 嘅時候，一定要玩足全日，慢慢細味園內嘅每一樣事物！