之前分享咗 東京迪士尼樂園 各個園區嘅一啲特點同佈置，而家就只係剩低 探險樂園。探險樂園 就即係香港嘅 探險世界 啦，大家都有同樣嘅主題，佈置就固然係差唔多啦。黎到 探險樂園 嘅入口，都係有一個 Adventureland 嘅招牌，不過我地嗰個好似大啲喎！
呢邊都有個小瀑布，但同香港嗰個相比，都係比較細。可能係因為呢邊嘅遊樂設施較多啦，所以冇咁多位去整呢啲佈置。
又有一個熟識嘅裝飾，圖騰木柱，不過呢啲就唔會噴水嘅。之前俾大家睇過嘅 史迪仔 造型復活蛋，就係放咗響其中一支木柱上面！
呢到嘅樹屋叫做 魯賓遜家族大樹屋 Swiss Family Treehouse，唔需要坐木筏就可以上去。亦即係話整個樂園一共有兩間樹屋，除咗呢間之外，仲有一間響 西部樂園，嗰間就要坐木筏啦。兩間我都冇上到去，西部樂園 嗰間就因為粉飾工程啦，至於呢間就因為時間問題而冇上去參觀。
探險樂園 仲有另一邊設計到好似一條小巷，兩邊佈滿美式建築。但點解 探險樂園 會有小巷呢？咁係因為呢到係參照咗加洲 迪士尼樂園 嘅主題園區 New Orleans Square；呢個園區入面有 加勒比海盜 呢個遊樂設施，但因為東京呢到冇呢個園區，所以就選擇咗最貼緊海盜主題嘅 探險樂園， 響呢到將部份園區佈置複製過黎。
東京迪士尼樂園 園內設有好幾個郵箱，俾人寄信或者寄明信片，其中一個就係響呢條小巷。我就係用呢個郵箱黎寄明信片架啦！所有響樂園內寄出嘅郵件更會被蓋上紀念郵戳！
上面提及到 加勒比海盜 呢個遊樂設施，下一篇文章就會同大家分享一下呢個海盜探險之旅！
沒有留言:
張貼留言