又黎到一個香港都有嘅遊樂設施，玩嘅時候，焦點自然就會放響同香港版本嘅分別。東京迪士尼樂園 小小世界 it's a small world，外觀同香港差唔多，但我就更喜歡佢夠色彩繽紛。
可能都係因為較舊，呢到嘅入口招牌係冇香港咁靚，頗為單調。
入到去等待區，條通道都幾窄。而入面亦有海報，反而海報上嘅圖案同香港個入口招牌幾似。
經過較窄嘅通道之後，就出到去非常廣闊嘅上落區。
呢到的確比起香港廣闊得多，而牆上亦有好多好靚嘅壁畫。
上船啦！響正式開始世界之旅之前，有一段歡迎嘅字句。
入面大部份嘅場景都同香港差唔多，不過睇落就當然冇咁新淨啦。唔同嘅地方，係呢到同之前分享嘅 加勒比海盜 一樣，周邊都係水，就好似真係響大海上航行咁。另一方面，呢到係冇 迪士尼朋友 嘅出現，因為 小小世界 內有 迪士尼朋友 係香港獨有嘅。
小小世界 係我唯一會響過程中影相嘅遊樂設施。我唔講咁多啦，直接俾相大家睇啦！
以上嘅場景，都係香港有嘅。然而，響最後 世界大同 一部份，呢到就有一棵樹，我好鍾意。
最後就係以世界不同語言嘅「再見」黎做旅程嘅終結。
返到黎上落區，呢個簡短嘅環遊世界之旅亦正式結束！
沒有留言:
張貼留言