每個迪士尼巡遊表演都有漂亮嘅花車，輕快嘅音樂，俾人好開心嘅感覺。而 東京迪士尼樂園 嘅日間巡遊正正就將以 歡騰 Jubilation 黎命名。雖然我去樂園玩嘅當日，全日都不斷落住毛毛雨，但好好彩，呢個巡遊並無取消。歡騰 嘅第一架花車，就有 米妮 做主角！花車上仲有 藍仙女 企到好高！
米妮 著到好似一位公主咁，優雅地向大家揮手。
一個巡遊，又點少得一班演藝人員響到跳舞呢！
之後就有公主花車，特別嘅係，佢地都係成雙成對咁一齊出現，唔似香港咁，得公主無王子。
一對對公主王子跳舞，真係浪漫！
第三架花車係森林花車，上面有好多小動物 迪士尼朋友。
花車頂端有一位森林精靈，我覺得幾靚幾有型。
花車較前部分有 飛濺山 入面嘅故事主角，來自電影 Song of the South 嘅 Br'er Rabbit。
後半部就有我愛嘅 Winnie The Pooh！仲有佢班朋友仔一齊坐響把雨傘入面。 不過我唔太鍾意呢個安排，雖然係得意啲，但就睇得冇咁清楚。
延續森林嘅主題，下一架花車有 獅子王 以及 森林王子 The Jungle Book 嘅組合，而響兩架森林花車之間，亦有啲色彩鮮艷嘅長頸鹿出場！
香港 迪士尼飛天巡遊 都有呢兩部電影嘅組合花車，仲好長添，不過呢架就冇咁長。
小辛巴 企咗響車頭，好似皇帝出巡咁！XD
後面就有 The Jungle Book 嘅灰熊 Baloo，佢坐咗響條蛇上面！0_0
第五架花車就輪到 妮露 同埋 史迪仔 啦！佢地企咗響一間夏威夷木屋入面！
睇下 史迪仔 個樣幾搞笑！跳下跳下咁好搞鬼！
小飛俠 都有一架獨立花車啊！花車前有一班戴上海盜帽嘅演藝人員跳舞。
花車上都有好多黎自 小飛俠 電影嘅設計，例如骷髏骨岩洞同埋彎月亮等。
小飛俠 企咗響海盜船上，想要對付 鐵勾船長！其實呢個海盜船亦即係香港 迪士尼飛天巡遊 史迪仔 花車上面嘅大韆鞦。
再之後就黎到一架充滿歡樂氣氛嘅遊樂場花車，花車上仲有一座過山車！
花車前面部份有 皮諾丘 坐響鯨魚上面！
中間部份又有我鍾意嘅 迪士尼朋友，小飛象！
花車嘅最尾部份就有 三隻小豬。
第八架花車就有 怪獸公司，大眼仔米高 坐響車頭，好似好興奮咁。咦！我呢一刻再睇呢張相先發現，原來車底個滾輪有轆扁咗嘅 變色龍！
毛毛 就響後面做司機，控制呢架工作車！
反斗奇兵 咁歡迎，又點會冇佢地份呢？不過一眾玩具出場前，就有裝扮成太空戰士嘅演藝人員跳舞。呢套造型好似好過香港喎！
首先有一支小火箭，上面裝住好多 綠色小人 三眼仔 啊！
睇下呢架花車，又有波波，又有積木，好多玩具啊！巴斯 仲企到好高！
胡迪 同埋 翠絲 就坐咗響後面個高台上面，個台仲會不停旋轉架！
真係周圍都有 三眼仔 嘅蹤影！難怪佢會咁受歡迎！
去到整個巡遊我最鍾意嘅部份，不過唔係花車黎... 而係有七對演藝人員穿上代表樂園內七個主題園區嘅裝束，好有心思啊！唔知大家又認唔認得各對演藝人員係代表緊邊一個主題園區呢？
去到第十架花車啦！亦係最後一架啦！當然就係屬於 米奇 架啦！可以見到花車上有一座城堡響中間，仲有 奇妙仙子 響後面。除咗 米妮 響第一架花車之外，其他 米奇家族 嘅 迪士尼朋友 都響呢架花車上出現！
米奇 著上禮服，同大家見面，佢好有型啊！
布魯托 都響下面跳舞跳得好開心！的確係與眾歡騰！
花車最後除咗有 奇奇帝帝，亦有之前響 迪士尼復活節奇幻世界 巡遊見過嘅女花栗鼠 Clarice。
巡遊嘅結尾有一架細車，係賣廣告嘅。=_=
先唔講巡遊規模，但人地個巡遊真係多好多 迪士尼朋友 同大家見面！我地香港，真係只有 米奇水花巡遊 會多返啲少見嘅 迪士尼朋友 出現，如果連平常嘅巡遊，以及係樂園嘅各處，都多返啲不同嘅 迪士尼朋友，我會好開心！
沒有留言:
張貼留言