之前已經介紹過 東京迪士尼樂園 內不同嘅遊樂設施，而家就只係剩下最後一個。但係呢篇文章並唔係講佢，而係講玩完佢之後會去到嘅一間商店。響香港，我地玩完 小熊維尼歷險之旅 之後，會去到一間叫 Pooh Corner 嘅商店，至於東京呢到，雖然就唔係叫 小熊維尼歷險之旅，入面亦有好大分別，但係玩完個遊戲設施之後，都係會去到 Pooh Corner 商店。
話到明係 PoohCorner，入面當然就係賣 Pooh 嘅商品啦！入面真係有好多好得意可愛嘅 Pooh Pooh，令到我眼花撩亂！0_0
啲特別大隻嘅 Pooh Pooh，更加有一張木椅俾佢地坐！
有咁多 Pooh Pooh 圍住我，本身鍾意 Pooh 嘅我，當然抵抗唔到佢地嘅引誘！除咗之前分享過嘅 鎖匙扣毛公仔 以及 家庭用品 之外，我仲買咗一系列嘅文具！
我買咗兩版貼紙，其中一版係 Pooh 嘅各種表情，而另一版更加有毛絨設計！
至於記事簿，就分別買咗一本大嘅同埋一套迷你嘅。睇下個包裝，有 Pooh 以及城堡嘅圖案架！
大嘅一本，上面有英文字母砌成一個心型，除咗 Pooh 之外，仲有 豬仔 Piglet 出現！
入面有 Pooh 嘅水印，仲要係半透明，唔洗驚會阻住你寫野！( 雖然正常黎講我都唔會用 =_= )
而嗰套迷你記事簿，一共九本，就係用咗樂園內嘅七個主題園區做主題嘅。
另外有一本就用咗樂園地圖做背景，而背後就全部都統一返用城堡黎設計。
好啦，講完 Pooh 商店同埋 Pooh 商品，唔好俾佢停！下一篇文章就會帶大家進入一個新奇、震撼嘅 Pooh Pooh 世界！你準備好未呢？
沒有留言:
張貼留言