去到最後一個重點遊樂設施，亦係最後一個分享嘅 東京迪士尼樂園 遊樂設施。Winnie the Pooh 真係好受人歡迎，我都係其中一個粉絲。一位咁多人喜歡嘅 迪士尼朋友，自然就會擁有一個屬於佢自己嘅遊樂設施；香港就有 小熊維尼歷險之旅，而東京呢邊就有 小熊維尼獵蜜記 Pooh's Hunny Hunt。
香港嘅 小熊維尼歷險之旅 好多時都要排好耐隊，所以最緊要就係拎 Fastpass。響到訪 東京迪士尼樂園 之前，響網上檢查過 小熊維尼獵蜜記 嘅等待時間；嘩，正常要排一個半鐘頭以上，Fastpass 亦轉眼間就會派哂！所以，當日一衝去玩完 怪獸公司迷藏巡遊車，就即時去拎返張 Fastpass。講到 Fastpass，東京呢邊啲 Fastpass 發行機好得意，係唔需要成張飛放入去嘅；只要將門票上嘅電腦條碼對準掃瞄器，張 Fastpass 就會跌出黎架啦！另一方面，響香港，未夠鐘就想拎下一張的話，會出一張寫住「無效」嘅 Fastpass；而呢邊，佢係唔會跌任何野出黎，環保啲。
夠鐘入去玩啦！Fastpass 真係快好多！響戶外等待區，佢地整到好似一個小花棚咁。
一入到去室內，就黎到 Winnie the Pooh 嘅屋企。呢到有 維尼 食嘅水果喎！
呢到亦有玩具，仲可以見到 Pooh Pooh 好鍾意玩嘅嗰個汽球啊！有隻小木馬，但好似唔啱佢玩喎，佢太大舊啦！
仲有一幅 百畝森林 嘅地圖；未睇呢幅地圖之前，我都唔知森林入面實際上有啲咩。
繼續響等待區入面行，開始入到去一個滿佈故事書頁嘅地方，香港都有呢啲故事書頁架。
每張故事書頁上面，都印有今次嘅故事名，Pooh'sHunnyHunt。
故事書頁上，有好多圖畫，全部都係 Pooh 同埋佢啲朋友黎架！
響欣賞呢啲故事書頁嘅同時，我亦發現呢到嘅牆面都係好靚！有一個個 Pooh 嘅圖案！
去到登上蜜糖罐嘅地方啦！呢到都有 百畝森林 嘅地圖，仲要係加大版！
雖然我通常玩呢啲室內遊戲設施都唔會影相，太快太暗好難影，同埋想留返俾大家親身經歷；不過響呢個遊樂設施上面，我真係忍唔住！實在係太正啦！我一定要影俾大家睇下有幾咁正！響正式開始獵蜜之旅之前，影咗呢一張相；大家睇唔睇到有咩特別呢？
冇錯！呢到係冇路軌架！每次會有三個蜜糖罐，每個罐都會行不同嘅路線。亦即係話，要真玩哂呢個遊樂設施，睇哂入面嘅所以野的話，你就要玩三次啦。香港迪士尼樂園 將於明年春季嘅 迷離大宅，都係採用咗呢個系統架！
第一個場景，就係 百畝森林 刮起大風！大家可以見到整個場景整得非常立體。
Pooh 仲同佢個汽球一齊俾風吹起咗！而 豬仔 就好努力地想入返樹屋入面。
去到第二個場景，我地跟住 跳跳虎，一齊紮紮跳！跳跳虎 係由動畫顯示出黎嘅。不過響呢個時候，明明坐緊響蜜糖罐入面，但係就好似玩緊跳彈床咁！我諗咗好耐，都耐唔明佢點做到呢個效果！究竟係架車彈緊，定係成個地板彈緊呢...？
之後又入到另一間房，又再有動畫睇，今次係睇 Pooh Pooh 訓覺。
佢訓緊時發咗一個夢，而我地亦隨即進入佢嘅夢境入面，黎到一個蜜糖世界！
呢到嘅空間好大，三個蜜糖罐將會分開，各自有不同嘅體驗。
其中一個體驗，就係會將你對正呢個大炮。點火，發炮！如果佢只係得風噴出黎，都已經算幾過癮啦！但最估唔到係，佢竟然會有焦糖味道噴出，好香！
離開夢境世界，我地返返黎現實，Pooh 最後亦成功搵到佢最愛嘅蜜糖！又再一次估唔到，呢間房入面，充滿咗甜甜的蜜糖味道！
獵蜜之旅正式完結，出口呢到周圍都係嗰隻好靚嘅牆面！
如果你有玩過香港嗰個版本，你會發現以上東京嘅版本，個故事其實係差唔多，甚至短啲添！但係，呢邊用嶄新嘅系統，令蜜糖罐響你無法預知嘅情況下前進，亦做到意想不到嘅彈跳效果！加上設計得更立體嘅場景，以及從未體驗過嘅嗅覺效果，令一個平平無奇嘅遊樂設施變得神奇！我第一次玩嘅時候，係全程呆咗，特別係因為你好熟悉每一個場景，但就好似黎到一個升級版！只係睇我啲相同我打嘅文字，係絕對唔能夠感受箇中樂趣，你亦可能覺得我好似發咗癲咁... 但如果你真係有機會去 東京迪士尼樂園 玩，就算冇 Fastpass，都一定要去排隊，排幾耐都抵！
沒有留言:
張貼留言