離開 東京迪士尼海洋 之前作最後衝刺!

去到下午4:30，夠鐘要離開 東京迪士尼海洋 啦...  不過臨走之前，我都作最後衝刺！衝刺啲咩呢？唔係衝去玩多個遊樂設施，要係衝去繼續買野！因為實在有太多 Duffy 產品啦！我地黎到鄰近樂園正門嘅 地中海港灣 廣場，我就入商店繼續掃貨，而爸媽就響長椅上休息。

呢間商店配合 米奇和Duffy的春日巡航 活動，除咗放滿一系列相關產品之外，仲有好多佈置！首先就有之前同大家分享過嘅 藍色行李箱，上面係好大個裝飾，而下面就係嗰啲造型袋。

有好多 迷你Duffy 啊！仲要全部都咁可愛！但因為買咗 水手裝迷你 Duffy，所以我冇買原裝呢款。

店內仲有一個用花瓣砌成嘅 米奇，佢下面仲有好多 Duffy 同埋 ShellieMay 圍住佢添！

因為 Duffy 實在太受歡迎啦，所以響 東京迪士尼海洋 呢到，每位賓客最多只可買三件同一產品。

講 東京迪士尼樂園 嗰陣就俾大家睇過啲商店櫥窗，都俾大家睇下 東京迪士尼海洋 呢邊嘅櫥窗啦！

好啦！整個 東京迪士尼之旅2012 只係剩低最後一篇文章，真係有啲唔捨得...  最後一篇文章，將會講到一啲能夠紀錄整個 東京迪士尼渡假區 旅程嘅紀念品，你估唔估到係咩呢？