嘗試用電腦畫出 偵探米奇!

有一個新分類叫做「想像 ‧ 繪畫」，不過嗰個分類主要會係一啲手繪嘅畫作；而其實我一直亦想嘗試用電腦黎畫畫，用電腦製作嘅作品會放返響「有趣創作」分類入面。

要用電腦畫畫真係一啲都唔簡單，所以我之後都要不斷練習，畫得唔好請見諒！>_<  今次係一個比較簡單嘅練習，只係跟返原有圖片黎嘗試繪畫，用咗 偵探米奇 做主角。大家會唔會覺得呢位 偵探米奇 有啲熟口熟面咁呢？因為之前佢響小弟嘅自製樂園指南出現過！但當時都未開始練習用電腦畫畫，所以張圖嘅質素就有啲參差，以下就顯示咗加工前後嘅分別。

加工前，張圖係比較朦糊；因為原本係一張好細嘅圖，我強行將佢放大，所以有咁嘅問題出現。

好啦！正式開始跟住呢張原圖繪畫返整個 米奇！我最先開始嘅，係鞋。

假如冇咗原圖，會係點嘅樣呢？等我俾大家睇下啦！

之後就繼續啦，我將整隻 米奇 分為幾個部份，帽、手、上衣、下衣、臉，每個部份慢慢畫出黎。

當整隻 偵探米奇 都畫完之後，就幫佢加陰影啦；加咗之後，個感覺會立體啲。

最後，因為啲色好似比較淡，睇落好似唔太實在，所以就調校到深色少少。

大功告成！可以響自製樂園指南加上去啦！同之前嘅感覺都幾唔同！之前有網友提供資料，講到每一張官方推出嘅樂園指南，封面上都會有一個 隱形米奇；所以我今次亦特別加返一個 隱形米奇 響封面上面，大家搵唔搵到呢？哈哈，應該唔難搵嘅！

今次第一次試用電腦畫畫，個製成品都算係咁啦...  但如果真係要畫出一幅超靚嘅作品，就需要長年累月嘅練習；我有空閒時間的話，會多練習架啦！