終於都開始分享 東京迪士尼海洋 嘅重點遊樂設施，今次一共有四個。咦？四個？通常唔係有五大遊樂設施嘅咩？冇錯，不過其中一個，忿怒雙神 冇開咁解。而呢篇文章所介紹嘅重點遊樂設施，係我覺得比較遜色嘅一個，我諗，隨住新嘅 反斗奇兵瘋狂遊戲屋 開幕，呢個遊樂設施應該會跌出五強... ( 講起呢個新設施，我呢排都有上返佢地嘅官方網頁留意等待時間，好似今日咁，剛剛睇完，只係開放咗個半鐘，已經要等320分鐘，果然係人氣爆燈！)
呢個遊樂設施就係位於 神秘島 嘅 海底兩萬哩 20,000 Leagues Under The Sea 啦。聽個名就可以估到，佢嘅故事係講述一班探險家深入海底兩萬哩去探索珍奇事物嘅。
入口之前俾大家睇過啦，就係呢個圓形嘅通道，呢到仲吊住咗一架潛水艇喎！
呢到設計到好似一個基地咁，有好多機械，中間嗰個應該係升降機黎嘅。
除咗上面嗰個小型潛水艇之外，仲有一架大啲嘅，不過我地坐嘅將會係小型潛水艇。
嘩！睇下個等待區幾長！不過我覺得好少可會用到咁長，因為佢好多時都只係需要等5分鐘。
好啦！我地上船啦！我地架潛水艇嘅編號係318，外殼嗰啲鏽漬都整得幾像真。
潛水艇有好多顯示儀，其中一個係講水深嘅；我地已經好接近海底兩萬哩啦！
經過一次海底歷險後，我地返上水面啦，出口呢到好暗，整個遊樂設施嘅區域真係好似一個基地。
離開時會經過另一邊嘅等待區，真係好大，仲有啲裝飾添，不過嗰次就冇得近距離咁欣賞啦。
我諗，佢唔係太受歡迎係有原因嘅，其實響船上係要由窗口望出去嘅；不過嗰個窗口就比較細，令我唔能夠睇清楚整個畫面，最後個感覺就唔夠震撼... 但撇除窗口細呢個問題，佢啲佈置都整得好細緻，如果唔需要等太耐的話，都值得一看！
沒有留言:
張貼留言