終於黎到最後一個要介紹嘅 東京迪士尼海洋 景點，一個集餐廳與娛樂表演於一身的地方。呢到原本係 Cape Cod 嘅市鎮會堂，但今日就搖身一變，變成 Cape Cod Cook Off 餐廳。
一入到去，就見到華麗嘅吊燈，以及一啲關於 Cape Cod 漁村 嘅壁畫。呢到應該響 Duffy 出現之前就已經建成，所以壁畫上並無 Duffy 嘅蹤影，只係顯示一個純樸漁村。
呢間餐廳採用快餐模式；餐廳內有兩種座位，一邊係可以欣賞表演嘅座位，另一邊就冇表演睇嘅。
配合 米奇和Duffy的春日巡航 活動，餐廳亦推出特別套餐，仲會附上一塊 Duffy 餐盤。但都可以選擇唔要，會平啲，我當然就哀求爸爸要埋個餐盤啦，哈哈！呢個套餐包含一包薯條、一個三文治、一杯汽水，以及一個小甜品。啲薯條應該放咗一段時間，唔係太好味；不過個三文治就幾正嘅，仲好清新健康添！
至於個甜品就係一個鮮橙果凍，甜甜地，都唔錯；上面有一塊印有 春日巡航 活動標誌嘅朱古力。
除咗呢塊大餐盤之外，仲有一隻小瓷碟，碟上嘅圖案係一樣嘅。
呢隻瓷碟係呢個 Duffy 頭型包點附送嘅，不過我已經唔記得咗呢個包係咩味道...
上面嗰個包係媽媽點嘅，至於我就另外叫咗一個 Duffy 頭型甜點，奶茶味嘅，好味道！
我仲特別拎咗呢張包裝紙返黎留念，因為真係設計得好靚啊！仲有 Duffy迪士尼小熊 嘅印章！
我地差唔多係下午1:00坐低嘅，有一小時享用餐點嘅時間，演藝人員俾咗呢張卡我地做記認。
入到黎可以欣賞表演嘅用餐區，呢到設計到好似一個倉庫咁，周圍都有木箱、貨物。
大家睇到上面張時間記認卡，以及呢篇文章嘅標題，應該都知道呢個表演係 Duffy 做主角嘅。表演名為 My Friend Duffy 摰友Duffy，一共有兩節，每節15分鐘，分別係兩個不同嘅故事。好幸運，我地搵到一張枱，係響正舞台前面架！不過就唔係正中位，但都已經好開心！
舞台布幕都設計得好靚，舞台旁邊亦有一啲 米奇 同埋 Duffy 嘅畫作。
我地坐低冇幾耐，表演就開始啦！第一個故事係關於 Duffy 嘅誕生，首先有 米妮 出場！
米妮 知道 米奇 即將要出海探險，所以就響屋企準備緊一份禮物俾佢，而呢份禮物就係 Duffy 啦！( 大家可以見到呢隻 Duffy 係冇腳印圖案嘅... 唔知點解呢？可能呢個就係 Duffy 最原先嘅樣... )
唐老鴨 同埋 黛絲 黎到探 米妮 喎！佢地都覺得呢份禮物好有心思，好可愛。
佢地兩個離開之後，輪到 米奇 黎到啦！睇黎佢對於出海探險，感到好興奮喎！
米妮 向 米奇 介紹呢一份小禮物，米奇 知道後當然好開心啦，所以佢地就一齊跳舞啦。
之前不同嘅文章入面，大家應該留意到 Duffy 總係戴住一個玻璃瓶頸飾，其實係同呢個故事有關。米妮 而家就正正拎住一個一模一樣嘅頸飾，入面裝咗一張紙，係一封情信黎嘅；當然就係 米妮 寫俾 米奇 嘅情信啦，內容就講到 Duffy 會為 米奇 帶來好多嘅幸運同埋快樂。
米妮 為 Duffy 戴上呢個玻璃瓶頸飾，象徵將自己對 米奇 嘅愛交托響 Duffy 身上。之後，神奇嘅事就發生啦！突然漆黑一片，一隻熊仔慢慢行出黎...
係 Duffy 啊！佢變得有生命啊！相信就係 米妮 嘅愛，為呢隻小熊帶來生命！
剛剛誕生嘅 Duffy，對於自己嘅身世感到疑惑，所以 米奇 米妮 就開始慢慢解釋俾佢聽啦...
Duffy 知道屬於自己嘅故事之後，第一時間就同製作佢嘅 米妮 擁抱，好溫馨呢！
Duffy 啲動作有啲笨拙，傻下傻下咁，不過就係咁先至可愛嘛！
布幕慢慢落下，呢個關於 Duffy 誕生嘅故事，亦響歌聲之中正式結束。
至於第二節舞台劇，就係關於 米奇 同埋 Duffy 出發去出海探險嘅... 一開始有海鷗郵差做介紹。
Duffy 再次出場啦！今次佢著住咗一套水手裝，響台上唱歌。
以下呢張相可以好清楚睇到 Duffy 嘅嗰條好有意義嘅玻璃瓶頸飾，佢無時無刻都會戴住佢。
米奇 黎啦！同之前一樣，佢都係著住船長衫；佢地兩個已經準備好出海啦！
Duffy 好期待呢一次嘅海上旅程，台上出現一幅又一幅 Duffy 幻想呢次旅程嘅圖畫...
之後，米妮、唐老鴨、黛絲 都黎到為 米奇 同埋 Duffy 送行！
台上展示印有「Bon Voyage 旅途愉快」字樣嘅旗幟，米奇 同埋 Duffy 出發啦！整個 My Friend Duffy 舞台劇亦正式劃上句號。( 表演係不斷連續演出嘅，之後會再做返第一節。)
我啲 Duffy 都坐咗響到欣賞呢套關於佢地嘅舞台劇，睇黎佢地都睇得好投入喎！
睇緊呢套舞台劇嘅時候，我有一種莫名其妙嘅感動；唔知點解，我覺得劇入面嘅情節好真實... 一直以黎，我都將 Duffy 佢地視為我嘅好友，亦相信佢地會為我帶來歡樂同埋幸運... 能夠同佢地一齊欣賞呢齣舞台劇，的確係一次好難得嘅體驗，我永遠都唔會忘記呢種感覺...
沒有留言:
張貼留言