踏正夜晚八點鐘，我地就去到 米奇廚師餐廳 嘅門口排隊，等候安排入座。
門口除咗有 米奇廚師餐廳 Chef Mickey 嘅招牌之外，仲有一個 米奇圖案。
接待處旁邊仲有一個好靚好大嘅生日蛋糕，不過係裝飾黎嘅，唔係用黎食嘅。
餐廳嘅設計都係好時尚嘅，不過當然亦有迪士尼元素啦！牆上畫有好多迪士尼朋友！
我地嗰張枱係四人枱，我、爸爸、媽媽，仲有 Duffy，每人坐一個位；睇下佢又坐得幾嘆！
剛剛排隊嘅時候，我見到佢地會派啲廚師帽俾小朋友，好得意，我又想要啊！於是，我就問一位演藝人員姐姐，可唔可以送一頂廚師帽俾我。佢知道我生日，所以二話不說就話冇問題！佢攞黎俾我嘅時候仲特別祝我生日快樂！真係多謝佢！
因為嗰日係星期日，所以 廚師米奇 會出黎同我地見面；都未開始食野，米奇 已經出黎啦！佢出場嘅時候，更加會揮動著餐巾，繞場一周，同大家打聲招呼！
因為賓客較多，所以要輪流同 米奇 影相；未到我地嘅時候，就當然食下野先啦！啲野食都好好味，水準不錯！除此之外，啲餐碟仲好色彩繽紛添啊！
輪到我地同 廚師米奇 影相啦！我地同佢合照之外，佢仲特別擺姿勢俾我影佢，好可愛！
就黎去到晚上十點，米奇 亦夠鐘都要走啦；響離開之前，佢都再一次繞場一周，同大家講再見。
影完相，又食野食到飽飽地，做咩好呢？就係切生日蛋糕啦！事實上，我響餐廳冇切個蛋糕，因為真係食唔落；拎出黎影一影相之後就包返起佢，返房先再食。生日蛋糕黎到嘅時候，仲有一張代表著 米奇廚師餐廳 送俾我嘅生日卡！好開心啊，多謝你地！
當晚實在係太開心，所以都冇諗咁多野，我同個蛋糕合照之後，唔記得就咁影下個蛋糕係點嘅樣... 咁唯有賣個關子啦，再下篇文章先再俾大家睇下我嘅生日蛋糕嘅相啦！
沒有留言:
張貼留言