在酒店房間中欣賞綻放的煙火...

先前都講到，我地嘅房間係 迪士尼樂園景觀客房，可以隱約望到樂園嘅遊樂設施。不過更奇妙嘅係，黎到晚上，我地更加可以響房入面欣賞煙火表演！( 我去之前都醒唔起... =_= ) 當晚係暑假嘅最後一日，樂園嘅開放時間都仲係比較長，關閉時間及煙火表演時間係夜晚九點鐘。

其實我地響 米奇廚師餐廳 嘅用膳時間係八點至十點，亦即係，我地響食食下野嘅途中返咗上房。不過爸爸話佢冇咩興趣睇煙火，響餐廳求其睇下都冇所謂，所以就只得我同媽媽上房睇。上到房，響窗口望出去，煙花仲未開始，但係都可以欣賞一下酒店前門嘅夜景。

房間入面部電視嘅其中一個頻道係特別為煙火表演而設嘅，會響表演期間同步播出表演音樂。

雖然響樂園入面睇過咁多次，亦試過響不同嘅主題園區入面睇，但係今次響呢到又有另一種感覺...  可能係因為個角度同平時都有好大分別，再加上周圍冇咩其他嘅建築物，好似有啲唔慣咁...

就算同平時個感覺好唔同，整個過程都好奇妙嘅，亦令我響生日前夕繼續沉醉於呢個迪士尼世界...