終於等到啦！迪士尼雪亮聖誕2012 今日正式開始！今日一早就入咗去樂園體驗濃厚嘅節日氣氛！今日響樂園入面都發生咗好多事，有好多野都想同大家分享，之後幾日會陸續慢慢放上黎。但係今晚有一樣野必定必定要即刻同大家分享，因為呢樣野實在係太奇妙啦！我不得不讚！
之前知道今年活動同上年冇咩大分別之後，真係有啲失望，只能夠盼望會有啲特別嘅驚喜啦... 估唔到今年嘅 大街閃雪亮燈，正正就為我地送上一個意想不到嘅驚喜，令整個晚上充滿奇妙感覺！
黎到傍晚，今年全新嘅聖誕樹亮起部份燈光，不過佢依然期待著稍後亮起身上每一顆燈光嘅一刻...
大家都已經眾集響 美國小鎮大街 嘅中間，靜靜等待燈光熄滅，大街閃雪亮燈 開始嘅一刻。
一眾拎住雪花燈柱嘅演藝人員逐個逐個行出黎啦！驚喜一：今年換上全新設計嘅雪花造型燈柱！以前雪花燈柱嘅設計就高貴啲，而呢個新設計加上顏色，感覺上好似比較幻麗，我好鍾意啊！
驚喜二：響表演中演出嘅演藝人員亦一同換上新裝！今年套新衫好靚，比起以前更加有吸引力！
米奇、米妮、高飛 都企咗響巨型雪橇花車上，響聖誕樹前面出現；呢一部份就同上年冇咩差別。
一齊倒數！「三、二、一！」一支支雪花燈柱隨隨亮起，由大街嘅盡頭一直延伸至聖誕樹前。驚喜三：全新聖誕樹、全新燈光效果！今年嘅聖誕樹燈光效果變化多端，我特別喜愛彩色燈光！
亮燈完結之後，美國小鎮大街 亦開始落雪啦！雖然整個過程唔算好耐，但係都已經睇到我好感動。
上次響日間睇呢棵新聖誕樹，都已經覺得靚過舊嗰棵；今次亮埋燈，佢嘅分數更加大大拋離添啊！
行埋啲可以睇到一點一點嘅燈光；佢地不斷變色，好壯觀，可惜相片未能完全展現咁靚嘅景況...
響亮燈過後，大街建築物上嘅聖誕掛飾亦一同亮起白色燈光，就好似同聖誕樹互相映照咁。
睇完 大街閃雪亮燈，我全日嘅任務經已完成，可以離開；臨走前都影下亮燈後嘅 大街火車站 啦！
單單靠文字同埋相片真係好難描繪到當時嘅整個情境，最好都係親自感受 大街閃雪亮燈 嘅奇妙！當你入到去樂園體驗 迪士尼雪亮聖誕2012 時，記住千祈唔好錯過呢個咁好睇嘅表演啊！:)
沒有留言:
張貼留言