聽日就係11月15日，亦即係 迪士尼雪亮聖誕2102 開始嘅日子，我聽日將會再次入樂園玩足全日！之前就話過我申請咗做商品部嘅季節性兼職演藝人員，過去兩個幾禮拜我都好落力地睇實部電話；不斷等待佢地打電話黎叫我面試，不過佢地並冇打黎，而我響樂園招聘網頁亦再搵唔到有關職位。咁我諗應該係佢地已經請夠人，亦即係話我暫時都未能夠成為一位 香港迪士尼樂園 嘅演藝人員...
不過我仍然唔會放棄！有朋友同我講，通常去勞工處搵嘅話，機會竟然大過響樂園官網申請！0_0 好，等我遲啲去留意一下先！我相信我屋企入面嘅每一隻 Duffy迪士尼小熊 會繼續為我帶來好運！呢一刻，我就繼續用賓客嘅身份去享受 香港迪士尼樂園 迪士尼雪亮聖誕2012 嘅奇妙感覺啦！
2012年10月30日
唉... 之前本身就諗住響 迪士尼黑色世界2012 申請做短期兼職演藝人員，可惜事與願違... 先後因為未夠18歲、遷就唔到時間等嘅問題，最後都仲未能夠成為一位樂園嘅演藝人員。但係成為一位演藝人員，畢竟係我一直以黎嘅夢想，我又點可以咁容易放棄呢？好快就到 迪士尼雪亮聖誕2012，樂園又請人啦！我見到之後，當然毫不猶疑咁又再申請啦！
其實有好多網友知道我想做演藝人員之後，都好好人咁俾咗好多意見我，叫我諗清楚... 我都知道，做演藝人員唔會係我想像中咁美好，感覺亦唔會好似入去玩嘅時候咁完美。但藉著一份對迪士尼嘅喜愛，一份自己對夢想嘅執著，我相信我會撐得住，會不斷堅持落去！可能你會諗「好多迪士尼Fans入去做之前咪又係咁講，入到去之後咪即刻頂唔住唔做囉！」
事實上，我都有好認真咁諗個呢個問題；究竟我自己去到最後，會唔會重蹈其他人嘅覆轍呢？我亦有擔心過會出現呢個情況，不過我知道，無論如何，我都仲有你地一班網友嘛！雖然我地好多都未見過面，只係響呢個Blog入面，靠著瑩光幕上面嘅一兩句留言所認識；但正正就係呢一兩句留言，令我認識到一班志同道合，同我一樣都係喜愛迪士尼嘅朋友！
認識到大家，除咗係對我嘅一份鼓勵，令到我有動力去到今時今日都繼續去寫Blog之外，同時亦令我感受到，我地每一個人都希望可以見証樂園嘅成長；既然係咁，我唔需要再害怕！只要我一返返黎自己嘅呢個Blog，諗起自己同埋網友們對呢個樂園嘅熱愛，我就點都唔會放棄！
我原本係想做 遊樂設施及賓客服務部，不過佢地今次唔請人，所以我就申請咗去 商品部。但係都唔緊要啦，只要可以與不同嘅賓客交流，能夠為賓客服務，我就已經好開心架啦！希望佢地快啲打電話黎搵我面試，我好緊張啊！因為我好驚聽唔到電腦而失去咗個機會... 上一次我就幻想過自己做到演藝人員之後，大家見到我嘅話，可以走埋黎同我打聲招呼！而家等我再幻想下啦！如果你見到一個名牌寫住Thomas而又好似我咁嘅物體，記得黎搵我啊！
上面嗰張 Duffy 嘅相其實係有意義嘅，一黎，聖誕裝嘅 Duffy 代表今次 迪士尼雪亮聖誕；另一方面，Duffy 係一隻會帶來歡樂同埋幸運嘅小熊，而 Duffy 響我生命中的確帶來歡樂、幸運；所以，我好希望今次都唔例外，Duffy 繼續會為我帶來歡樂、幸運，俾我可以實現自己嘅夢想！
沒有留言:
張貼留言