昨日重新整理過電腦入面嘅相，又睇返好多以前嘅相，當中都有啲係關於 迪士尼雪亮聖誕 嘅... 之前試過響呢個Blog講返前幾年嘅 迪士尼黑色世界，既然係咁，今次就講下昔日嘅 雪亮聖誕 啦！
再睇返以前啲相，發現自己影相真係一般，再加上部機太舊，啲相有啲都好朦，真係唔好意思啊！雖然啲相未必係好完美好靚，不過都正如我前排咁講，相片所記載嘅故事先至係最重要嘅！特別係因為我以前唔係好似而家咁成日入樂園玩，有好多野都已經唔係太記得清楚，慢慢忘記咗；而呢啲相就正正幫我紀錄低以前見過嘅野，發生過嘅野，好讓我黎到今日都仲可以諗返起以前...
講返啲歷史先，樂園嘅 全年通行証 響2006年首次推出，而我嘅第一張全年証就係響2007年買嘅。雖然一直都好鍾意 迪士尼，不過嗰陣時先至得中一，傻下傻下，我又邊會咁留意樂園發生嘅事丫... 引象中，2007年嘅 迪士尼黑色世界 同埋 迪士尼雪亮聖誕 我都冇去過，就算有都冇相片留返低...
至於2008年，呢兩樣節日活動都有相可以俾我睇返，所以都仲隱隱約約記得所發生過嘅事！以下就係 迪士尼雪亮聖誕2008 嘅相片啦！睇完下面呢張相之後，我就突然醒起一樣野！樂園以前每逢有節日活動，都會更換 迎樂路 嘅旗幟款式，但而家點解又冇再換嘅呢？好懷念啊...
而呢棵聖誕樹我就唔係好懷念啦，因為都已經見咗咁多年，今年終於有新聖誕樹，係好事黎嘅！
美國小鎮大街 兩邊建築物啲聖誕裝飾，好似咁多年黎都冇咩點變過喎！咁耐以黎都仲係咁靚！
開始落雪啦！好浪漫啊！雖然每次落完雪，成個頭都係泡同埋地下會變到好跣，不過都值得嘅！
響黃昏都仲有一場 雪映舞動巡遊，放學黎到都有得睇，個氣氛仲正啲添！好掛住 巨型米奇！
雪亮聖誕2008 其中一個最壯麗嘅景觀就係 星閃城堡 啦！壯麗程度同 奇妙仙子城堡 不相伯仲！星閃城堡 真係好靚，可惜我影呢兩張相嘅時候個位唔太好，城堡俾個舞台遮住咗，影得冇咁靚...
真係唔知2009年啲相去咗邊，上次搵唔到 黑色世界2009 嘅相，今次亦搵唔到 雪亮聖誕2009。
迪士尼雪亮聖誕2009 最深刻嘅就係新加入咗亮燈同埋 小小世界過聖誕，最衰啲相唔知放響邊...
既然係咁，惟有又係跳去 雪亮聖誕2010 啦！依然係同一棵聖誕樹，亦都仲有 雪映舞動巡遊。呢一年啲相有齊哂全個巡遊；如果冇咗呢啲相，我甚至已經唔記得咗 迪士尼巡遊表演 嘅細節！雖然我就覺得 迪士尼飛天巡遊 好睇啲，但加入咗聖誕節元素 迪士尼巡遊表演 都有吸引人嘅地方！
仲有可愛嘅 薑餅人！我由細到大都好鍾意 薑餅人！我買過黎食，就發現，都係睇下就好啦... 哈！
米奇 米妮 著上聖誕老人服裝黎同大家見面！咁上年2011年套聖誕衫好似靚啲喎，亦都仔細啲。
嗰年試咗呢個 米奇窩夫，買窩夫包埋一盒士多啤梨粒，幾好味！米奇 耳仔上面啲忌廉好得意！呢個窩夫而家都仲有得買黎食，不過我咁耐以黎都只係嗰年食過一次咋，因為都唔平架...
大街上有一啲用咗 米奇家族 造型設計嘅聖誕士的裝飾，樹上面亦掛有小禮物，好有節日氣氛。
假如你問我 雪亮聖誕2010 邊樣裝飾最精彩，就絕對係 薑餅人村莊！好想再有機會見返呢個村莊！佢地響樂園 中央廣場 整咗成個 薑餅人村莊 出黎，入面啲裝飾又整得好細緻，真係不得不佩服！
如果好彩嘅話，更加可以響 薑餅人村莊 偶然遇上 積木士兵 出黎同你影相！佢地又係好可愛啊！
好啦，我地穿過城堡，進入 幻想世界，去睇下另一個亦都係我自己好鍾意嘅 雪亮聖誕 體驗！
就係 小小世界過聖誕 啦！小小世界 分別響 雪亮聖誕2009 同埋 雪亮聖誕2010 都有變過身。
小小世界 出面鐘樓上嘅搖擺笑臉戴咗聖誕帽，廣場上亦都有一啲以 小小世界 公仔為題材嘅裝飾。
至於入面嘅歡笑之旅，除咗依舊播放 世界真細小 之外，亦插入 Jingle Bells 呢首好出名嘅聖誕歌。而響不同嘅場景入面，都加上一啲聖誕佈置，一開始嘅北極場景仲有聖誕老人出現添！
黎到最後一幕，世界大同，有雪人同大家一齊唱歌；聖誕老人 亦響上面同大家講再見啊！
黎到晚上，當然要睇下配合燈光效果嘅佈置啦！除咗浪漫之外，都繼續帶出 小小世界 嘅歡樂氣氛。
就連廣場上嘅樹木都發出一點點嘅燈光！真係令人倍感浪漫溫馨！聖誕節就係咁美好...
迪士尼雪亮聖誕2010 冇咗之前嘅 星閃城堡，只係得返一啲投影效果，即時覺得好似有啲失色...
另一個又係我好喜愛嘅環節就係 大街玩具巡禮 啦！因為整個表演個感覺都係好奇妙！米奇 米妮 一齊坐住聖誕列車出黎，其實呢架列車正正就係由 米奇雨天滴答列車 改裝而成嘅。
黎到聖誕節，米妮 話有禮物想送俾 米奇！一支支雪花燈柱響黑暗之中亮起，慢慢去到聖誕樹前面；聖誕樹亦都開始由下而上亮起燈光！亮燈過後，有一隻熊仔出現響 米奇 米妮 旁邊，原來係 Duffy！
雖然呢個表演入面嘅故事就冇東京嘅 My Friend Duffy 咁感覺，不過都已經好感受到奇妙嘅感覺。再者，拎住每支雪花燈柱嘅演藝人員都係著住一啲玩具造型服飾，就好似一班聖誕玩具出黎玩咁！而呢班玩具之後更加演變成上年 雪亮聖誕2011 米奇玩具舞曲 呢個表演，今年亦會捲土重來！
講起 Duffy，佢正正就係響 雪亮聖誕2010 正式登陸 香港迪士尼樂園，唔經唔覺都已經兩年啦... 相信親愛嘅讀者們都知道我係 Duffy 嘅超級Fans，而我嗰陣就響樂園入面遇到呢隻咁可愛嘅小熊。
無論係商品櫥窗，又或者係商店裡面嘅貨架，都有好多 Duffy迪士尼小熊！場面真係好虛撼！唉... 又俾我見到當年嗰套聖誕衫... 再一次令我唔開心... 套衫咁靚，但我竟然冇買到！>_<
商店入面仲有其他聖誕佈置；睇返相令我記返起，之前 大街糖果店 入面會有巨型毛公仔俾人影相。以下就係 雪亮聖誕2010 嗰陣嘅巨型米奇，我略略記得我見過 米奇 米妮，不過又唔知幾時冇咗...
就係 迪士尼雪亮聖誕2010 呢個活動，令我擁有咗第一隻 Duffy迪士尼小熊，佢都就黎兩歲生日啦！我前排去探究返我係響邊一日買佢返黎，終於俾我搵返佢嘅生日日期，到時再同佢慶祝一番！
2011年嗰啲相我就唔放響呢篇文章入面啦，因為上年嗰陣都已經開始咗寫Blog，廢時重覆。加上今年嘅活動同上年差唔多 ( 應該話係完全一樣 =_= )，所以暫時都唔係太需要懷念住，哈哈！雪亮聖誕2012 下星期四11月15日就開始啦！期待再次欣賞 米奇玩具舞曲 同埋 大街閃雪亮燈！
沒有留言:
張貼留言