自製樂園地圖 - 更新迷離莊園小路!

黑色世界 完咗，雪亮聖誕 又未開始，呢排都冇咩好講，搞到而家講啲野都係一啲無謂...  但係希望我自己同大家都可以撐著！雪亮聖誕 下星期四就會開始，咁就會有返多啲話題講架啦！

前幾日無無聊聊，諗起樂園方面終於都統一使用 迷離莊園 小路版本嘅地圖，不如我又試下整先！原來搵啲樹淨係黎遮住 迷離大宅 都唔係咁簡單，因為要好小心咁砌返一條合適嘅小路出黎。

嗯！大功告成！不過一放大咗張圖就可以見到有好多瑕疵，啲樹有啲假，仲有圖片質素一般...

除咗 迷離莊園 小路之外，園方呢排都響樂園地圖上面作出幾項更新，於是我又順便整埋其他野。首先，響 黑色世界 活動期間，黑色馬戲班 嘅位置由 灰熊山谷 改為屬於 探險世界 園區。不過而家佢地又用返舊版本，呢個位置被定為屬於 灰熊山谷 園區，咁究竟呢個位屬於邊到呢？

其實我自己就覺得應該屬於 灰熊山谷 嘅，因為響經過火車橋已經有一個顯示三大新園區嘅牌；即係話俾賓客知佢地已經進入緊呢三個新園區啦，所以呢個位歸屬 灰熊山谷 好似合理啲喎。其實都唔係太重要嘅啫，綠色同棕色都冇所謂啦，當然我就希望會有一隻新顏色嘅出現啦！ A_A

另一項就係配合返 Victorian Collection 開幕而作出更新，玻璃屋已經加咗入我嘅自製地圖入面啦！

最後，既然冇野做，我亦貪得意，整咗以下呢個帶有寄望嘅版本！你應該知道我講緊咩嘅！真係唔知我嘅寄望係咩嘅話，可以同第一張圖比較一下，嘿嘿！希望會儘快成真啦，好心急！>_<