今個星期返咗五日工，真係有啲累，但同時又好滿足！因為我視每樣工作都係一個學習嘅機會！特別係當我幫助到每一位賓客，見到賓客嘅臉上展現笑容，就算係微不足道，我自己都會好開心！返咗三個幾星期，店內大部份工作都開始上手；不過有時候都會撞下板... 唔小心做錯野... 但係每一次撞板係對我一個好好嘅教訓，提醒自己下次唔好再錯，俾我響失敗之中汲取經驗。
除咗響自己間鋪入面做野，呢個禮拜亦有好多新嘗試，例如去另一間店幫手、去戶外商店車幫手。最難忘都係響巡遊期間幫手維持秩序，當然唔係因為可以著上米奇寶石背心啦，呢樣係Bonus啫！「為確保你同我地演藝人員嘅安全，請依照演藝人員嘅指示」呢句廣播，好似冇咩特別咁；其實每一位演藝人員，包括我，都好緊張，因為要確保賓客飛躍奇妙之餘，最重要係玩得安全嘛！
上星期收到一份小禮物，就係一頂 米妮雪人聖誕帽！雖然想要 米奇雪人 多啲，但係我都好開心！頂帽大到遮住咗 Duffy 對眼；我每次放工就係好似佢咁，累到想即刻遮住對眼訓返覺，哈哈！
一份對迪士尼嘅熱愛，為我帶來好多野，為我嘅生命帶來奇妙，亦為我帶來成為演藝人員嘅夢想；如今，呢個夢想經已實現，我會珍惜每一個機會好好學習，繼續抱住純真嘅心做好每一件事。
呢一個月黎我都刻意將Fans同埋演藝人員呢兩個角色分開，好幸運，我暫時係未有人格分裂嘅！響 Tho'sDreams 有時都會好似呢篇咁分享下我嘅近況，而通常都會用返Fans嘅身份黎寫文章；但係，假如太忙嘅話，就未必可以好似以前咁成日有題材、時間去寫文章，希望大家可能體諒！
不過今日我將會用返Fans呢個身份去做一件事！本身諗住星期四考完試就去做，但後來時間不合... 呢件事係星期四先可以開始去做架！唔知大家估唔估到係咩呢？返到屋企後再同大家分享！嘿嘿！
沒有留言:
張貼留言