昨日就話用 迪士尼Fans 嘅身份去做一件事，完成之後就更加覺得各位 迪士尼Fans 一定要去做！究竟係咩呢？就係去咗睇 迪士尼 製作嘅最新動畫電影《無敵破壞王 Wreck-it-Ralph》！
響 Disney Channel 睇過呢套電影嘅預告片，知道係用遊戲世界做故事背景之後，就即刻好想睇；再加上預吿片亦有 Bowser、Dr. Eggman 等其他著名遊戲嘅奸角現身，令呢部電影嘅吸引力大增！到睇完之後，就只有一個感覺：正！無論係劇情鋪排、人物設定、場景設定，全部都做得好好！
電影入面嘅遊戲世界包含多種遊戲，而其中最主要嘅有三個，就係以下電腦桌布中所顯示嘅三個；三款遊戲都有截然不同嘅性質，可愛、夢幻、簡樸、經典、驚險，應有盡有，令電影更加豐富。同時亦有好多有趣嘅概念，將遊戲世界變成一個好獨特嘅故事，我要一路睇，一路探索箇中奧妙！
迪士尼 方面亦都配合電影推出，製作咗一款手機遊戲，遊戲模式就係參考返電影嘅 破壞王 遊戲。
破壞王 Ralph 發脾氣啦！遊戲主角 阿修 Felix 就要出動，修補返俾 破壞王 損壞咗嘅大廈結構！
呢個小遊戲簡單易玩，仲係免費架 ( 但只限iOS )！睇完電影之後再下載黎玩就覺得更加得意！亦有另一款應用程式，除咗包含以上 破壞王 小遊戲之外，亦包含埋其餘兩款電影相關小遊戲；不過就要俾錢嘅，大約係港幣$8，iOS App Store 以及 Android Play Store 均有發售。
其實，假如將電影入面嘅整個遊戲世界原汁原味整成一個電腦遊戲，我覺得已經會非常震撼！因為裡面嘅每一個細節都設計得好有心思！特別係睇完電影再玩，嗰種親身感受嘅感覺真係好正！講咗咁耐，唔知各位有冇興趣去睇下呢？如果聖誕節冇咩做，呢套戲都係一個唔錯嘅選擇！
沒有留言:
張貼留言